Արթուր Զախարյանի թիմը դուրս է եկել Ֆրանսիայի երրորդ լիգա

27-ամյա հայ կիսապաշտպան Արթուր Զախարյանի թիմը՝ «Stade Briochin»-ը, ժամանակից շուտ ապահովել է բարձրացում՝ դառնալով Ֆրանսիայի առաջնության չորրորդ դիվիզիոնի B խմբի հաղթող (Championnat National 2):

28 տուրերից հետո Սեն-Բրիյոյի ակումբը վաստակել է 56 միավոր և երկու տուր առաջ դարձել է անհասանելի հետապնդողների համար։ Այսպիսով, հաջորդ մրցաշրջանում «Stade Briochin»-ը հանդես կգա Ֆրանսիայի երրորդ լիգայում (Championnat National):

Այս հաջողության հասնելու գործում վճռորոշ դեր է խաղացել Արթուր Զախարյանը։ Հայ կիսապաշտպանը դարձել է թիմի լավագույն գոլային փոխանցողը՝ կատարելով 7 գոլային փոխանցում, ինչպես նաև խփել է 7 գոլ՝ երրորդ լավագույն արդյունքը թիմում։ Ավելին, Զախարյանը եղել է «Stade Briochin»-ի իրական շարժիչ ուժը և այս մրցաշրջանում չի բաց թողել ոչ մի հանդիպում։

Թիմի հաջողությունները չեն սահմանափակվել միայն առաջնությամբ։ «Stade Briochin»-ը նաև փայլել է Ֆրանսիայի Գավաթում՝ հասնելով քառորդ եզրափակիչ։ Այդ փուլում Զախարյանի թիմը հանդիպեց հզոր «Պարի Սեն-Ժերմենին»։ Ցավոք, այդ դիմակայությունը ավարտվեց 0:7 պարտությամբ, սակայն մինչև քառորդ եզրափակիչ հասնելը «Stade Briochin»-ը մրցաշարից դուրս էր թողել «Նիցցա»-ին, «Անսի»-ին և «Հավրը»-ին։

Արթուր Զախարյանի համար սա անկասկած լավագույն մրցաշրջանն է իր կարիերայում։ Մեկ տարի առաջ նա հանդես էր գալիս հինգերորդ դիվիզիոնում, սակայն արագ հարմարվեց նոր մակարդակին և դարձավ «Stade Briochin»-ի առանցքային խաղացողներից։ Հաջորդ մրցաշրջանը նրա համար դեբյուտային կլինի Ֆրանսիայի երրորդ լիգայում։

Արթուր Զախարյանի պրոֆիլը՝ մեր կայքում։