Արթուր Միրանյանի թիմը եվրագավաթներին կմասնակցի առաջին անգամ վերջին 53 տարվա ընթացքում

Ռումինական «Ունիվերսիտատեա Կլուժ» ակումբը, որի կազմում հանդես է գալիս Հայաստանի ազգային հավաքականի հարձակվող Արթուր Միրանյանը, եվրագավաթներին կմասնակցի առաջին անգամ 1972/73 մրցաշրջանից ի վեր։ Կլուժի թիմը ապահովեց իր մասնակցությունն ՈւԵՖԱ-ի Կոնֆերենցիաների Լիգայի երկրորդ որակավորման փուլում՝ շնորհիվ Ռումինիայի առաջնության կիրակնօրյա խաղերի արդյունքների։ Անկախ վերջին տուրերի արդյունքներից՝ «ուսանողները» պլեյ-օֆֆի չորրորդ հորիզոնականից ցածր չեն իջնի, իսկ եվրոպական լիցենզիա ունեցող պլեյ-աուտի մրցակիցները՝ «Սեպսին» և «Ֆարուլը», չկարողացան տեղ գրավել լավագույն տասնյակում և պայքարել եվրոպական ուղեգրի համար։

Այսպիսով, «Ունիվերսիտատեան» վերադառնում է եվրոպական ասպարեզ 53 տարվա ընդմիջումից հետո։ 1972/73 մրցաշրջանում ակումբը մասնակցեց ՈւԵՖԱ-ի Գավաթին՝ առաջին խաղում 4։1 հաշվով հաղթելով բուլղարական «Լևսկիին», սակայն պատասխան խաղում պարտվեց 1։5 հաշվով և դուրս մնաց մրցաշարից։

Արթուր Միրանյանի դերը ակումբում

Արթուր Միրանյանը միացավ «Ունիվերսիտատեա Կլուժին» 2024 թվականի սեպտեմբերին՝ տեղափոխվելով Երևանի «Նոայից», որտեղ դարձել էր Հայաստանի առաջնության լավագույն ռմբարկուն։ Ռումինական կարիերան հաջող մեկնարկ ունեցավ՝ նա առաջին փուլում խփեց երեք գոլ, սակայն մրցաշրջանի երկրորդ հատվածում ավելի քիչ խաղաց և արդյունավետությամբ աչքի չընկավ՝ ընդամենը 21 հանդիպում և 3 գոլ։

Միրանյանի համար սա կլինի երրորդ մասնակցությունը եվրագավաթներին։ 2019/20 մրցաշրջանում նա 6 խաղում 3 գոլ էր խփել «Փյունիկի» կազմում՝ Եվրոպայի Լիգայի որակավորման փուլում, կարևոր դեր խաղալով թիմի՝ երրորդ փուլ դուրս գալու գործում, որտեղ հայերը պարտվեցին անգլիական «Վուլվզին»։ 2021/22 մրցաշրջանում նա ևս երկու խաղ է անցկացրել «Ուրարտուի» կազմում՝ Կոնֆերենցիաների Լիգայի որակավորման փուլում։

2025/26 նոր մրցաշրջանում Արթուր Միրանյանը կրկին հնարավորություն կունենա զգալ եվրագավաթների մթնոլորտը՝ այս անգամ արդեն ռումինական ակումբի կազմում, որը Եվրոպա է վերադարձել ավելի քան կեսդարյա դադարից հետո։

Սակայն Միրանյանի պայմանագիրը «Ունիվերսիտատեա Կլուժի» հետ ավարտվում է 2025 թվականի ամռանը, և դեռևս հայտնի չէ՝ այն կերկարաձգեն, թե ոչ։ Սակայն հաստատ է, որ ռումինական թիմը մոտ է նոր հարձակվողի՝ «ՉՖՌ Կլուժի» Վիրջիլիու Պոստոլակիի ստորագրամանը, ինչը մեծ հավանականությամբ չի նպաստի Միրանյանի հետագա հեռանկարներին թիմում։