«Երբ լսում եմ Հայաստանի օրհներգը, սիրտս սկսում է ավելի արագ բաբախել». Ֆինն Գերագուսյանը տվեց իր առաջին հարցազրույցը Հայաստանում

17-ամյա «Սանդերլենդի» հարձակվող Ֆինն Գերագուսյանը, ով ունի հայկական արմատներ, Հայաստանի Մ-21 երիտասարդական հավաքական հրավիրվելուց հետո հարցազրույց է տվել Հայաստանի Ֆուտբոլի Ֆեդերացիայի մամուլի ծառայությանը։ Ֆուտբոլիստը պատմել է իր ճանապարհի սկզբի, ընտանիքի դերի, հայկական մշակույթի նկատմամբ վերաբերմունքի և ազգային թիմի նշանակության մասին։

— Ես սկսեցի ֆուտբոլով զբաղվել չորս-հինգ տարեկանից։ Այդ ժամանակից ես հավատում էի, որ ֆուտբոլը դառնալու է իմ կյանքի անբաժանելի մասը։ Օրվա ոչ մի պահ ես առանց գնդակի չէի անցկացնում։ Իմ ընտանիքն այդ ամենը տեսնում էր և ամբողջովին աջակցում էր ինձ։ Նրանք վստահ էին, որ ինձ մեծ ապագա է սպասում։ Իմ պապիկը մեծ դեր ունի նրանում, որ ես դարձա ֆուտբոլիստ։

Գերագուսյանի խոսքով՝ նրա առաջին թիմը եղել է տեղի ակադեմիան, իսկ «Սանդերլենդ» նա տեղափոխվել է 12 տարեկանում և մինչ այժմ շարունակում է զարգանալ այնտեղ։

— Իմ պապիկը հայ է։ Նա շատ է պատմել ինձ Հայաստանի և հայկական մշակույթի մասին։ Նա խոսում է հայերեն և այժմ ինձ էլ է սովորեցնում։

Հայաստանի Մ-19 հավաքական առաջին հրավերը հարձակվողի համար կարևոր պահ էր։

— Երբ առաջին անգամ հրավիրվեցի Հայաստանի մինչև 19 տարեկանների հավաքական՝ դա աննկարագրելի զգացողություններ էին։ Դա հրաշալի հնարավորություն էր՝ ճանաչելու հայկական մշակույթը, ձեռք բերելու նոր ընկերներ և աշխատելու նոր մարզիչների հետ։

Նրա համար առանձնահատուկ արժեք ունի հենց այն պահը, երբ դուրս է գալիս դաշտ՝ ազգային հավաքականի մարզահագուստով։

— Հագնել Հայաստանի հավաքականի տոպը՝ մեծ պատասխանատվություն է։ Լսելով երկրի օրհներգը՝ ես ոգևորվում եմ, սիրտս սկսում է ավելի արագ բաբախել։ Երբեմն դժվար է շփվել տղաների հետ, բայց և՛ խաղացողներն, և՛ մարզիչները շատ են օգնում ինձ։ Հայաստանի երիտասարդական հավաքականը մշտապես զարգանում է, ես դա տեսնում եմ։ Ես կանեմ ամեն ինչ՝ խփելու շատ գոլեր և թիմին բերել հաղթանակներ։

Գերագուսյանը առանձնացնում է իր հասակը որպես խաղային առավելություն․ 194 սանտիմետր աճը թույլ է տալիս վստահ պայքարել մենապայքարներում և պահել գնդակը։ Նա ասում է, որ ձգտում է կատարելագործել տեխնիկան և սառնասրտությունը, իսկ հարձակվողների մեջ իր համար օրինակ է Հարրի Քեյնը։

— Պրոֆեսիոնալ հարձակվողը պետք է լինի սառնասիրտ և միշտ փնտրի գոլի հնարավորությունը։ Այդ հատկանիշներով էլ հայտնի է Հարրի Քեյնը։ Իմ առավելությունը՝ իմ հասակն է։ Սկսում եմ օգտագործել այն և՛ պայքարում, և՛ գնդակը պահելու ժամանակ։ Ես ջանում եմ մշտապես բարձրացնել գնդակի հետ իմ տեխնիկան։

Խոսելով ապագայի մասին՝ Ֆիննը չի թաքցնում իր հավակնությունները։

— Ես կցանկանայի խաղալ «Սանդերլենդի» հիմնական թիմում։ ԱՊԼ-ում հանդես գալը յուրաքանչյուր ֆուտբոլիստի երազանքն է։ Եվ, իհարկե, ես շատ ցանկանում եմ խաղալ Հայաստանի ազգային հավաքականում։