Քիթ Կրիկորյանը միացել է UFC BJJ նոր նախագծին

Տիտղոսակիր հայ բրազիլական ջիու-ջիցուի մարզիկ Քիթ Կրիկորյանը միացել է UFC-ի նոր նախագծին՝ UFC BJJ: Road to the Title։ Խոսքը վերաբերում է իրականության շոուի, որը կներկայացվի առաջին UFC BJJ մրցաշարի ընթացքում՝ հունիսի 25-ին, UFC-ի Միջազգային մենամարտերի շաբաթվա շրջանակում Լաս Վեգասում։ Հունիսի 25-ին կանցկացվեն եզրափակիչ մենամարտերը, իսկ նախնական փուլերը արդեն կայացել են։

Նոր ծրագիրը հիշեցնում է «The Ultimate Fighter» լեգենդար շոուն՝ ընդգրկելով երկու քաշային կարգ՝ թեթև (155 ֆունտ) և կիսամիջին (170 ֆունտ): Թիմերի մարզիչներն են բանտամվեյթ կարգի (135 ֆունտ) աստղեր Մայքի Մուսումեսին և Ռերիսոն Գաբրիելը։ Առաջին մրցաշարի գլխավոր մենամարտը կլինի հենց մարզիչների միջև՝ առաջին UFC BJJ մինի քաշային կարգի չեմպիոնի տիտղոսի համար։

Քրիկորյանը ընդգրկվել է Գաբրիելի թիմում և ստացել է առաջին համարի կարգավիճակ թեթև քաշում։ Քառորդ եզրափակիչում նա հանդիպել է Մուսումեսիի թիմի փորձառու մարզիկ, 8-րդ համարը ունեցող Այզեկ Դոդերլայնին։ Լարված պայքարում մրցավարները միաձայն հաղթանակ են տվել Դոդերլայնին, սակայն Քրիկորյանը, որն արդեն փայլել է տարբեր պրոֆեսիոնալ լիգաներում, շարունակում է կարևոր դեր ունենալ UFC BJJ-ի ապագայի համար։

27-ամյա Քրիկորյանը սև գոտի է՝ «10th Planet Jiu-Jitsu»-ի հայտնի դպրոցի Ռիչի «Boogeyman» Մարտինեսի ղեկավարությամբ։ Նա հաջողություններ է գրանցել մասնագիտական հարթակում՝ հաղթելով ADCC 2022 ընտրականում, High Rollerz 10K-ում և այլ նշանավոր մրցաշարերում։ Նա նաև երկու անգամ հասել է ADCC ամերիկյան ընտրական փուլի եզրափակիչ՝ 2018-ին և 2019-ին՝ դեռ լինելով գունավոր գոտի, ինչը շրջադարձային էր նրա կարիերայում։

Ծնունդով Կալիֆոռնիայի Սան Դիեգո քաղաքից Քրիկորյանը մանկուց զբաղվել է բռնցքամարտով, այնուհետև կիկբոքսինգով և մուայ թայով։ Ավագ դպրոցում սկսեց մարզվել ՄՄԱ-ով և ըմբշամարտով, ինչի ընթացքում էլ ծանոթացավ ջիու-ջիցուի հետ՝ դառնալով ԱՄՆ-ում սաբմիշըն գրեփլինգի ամենաճանաչված դեմքերից մեկը։