Հայտնի է դարձել Հայաստանի ամենասպորտային մարզը 2025 թվականին

Ամփոփվել են Հայաստանի Հանրապետության մարզերի և Երևանի քաղաքի 2025 թվականի սպորտային վարկանիշի արդյունքները։ Հրապարակված տվյալների համաձայն՝ առաջին տեղը զբաղեցրել է Վայոց ձորի մարզը, երկրորդը՝ Կոտայքի մարզը, իսկ առաջատար եռյակը եզրափակում է Գեղարքունիքի մարզը։

Վարկանիշը կազմվել է Հայաստանի կրթության, գիտության, մշակույթի և սպորտի նախարարի հրամանով հաստատված կարգի համաձայն։ Վարկանիշային սանդղակի կազմման ընթացքում հաշվի են առնվել մի շարք ցուցանիշներ, որոնք արտացոլում են զանգվածային սպորտի զարգացման մակարդակը և բնակչության ներգրավվածությունը սպորտային գործունեության մեջ։

Գնահատման հիմնական չափանիշներ

Մարզերի տեղերը որոշելիս հաշվի են առնվել հետևյալ ցուցանիշները․

• Բնակչության մասնակցությունը նախարարության կողմից կազմակերպված զանգվածային սպորտային միջոցառումներին
• Սպորտային դպրոցներ հաճախող դպրոցականների մասնաբաժինը
• Հանրակրթական դպրոցներում գործող սպորտային խմբակների և սեկցիաների քանակը
• Կամավոր ատեստավորում անցած ֆիզիկական կուլտուրայի ուսուցիչների մասնաբաժինը
• Կամավոր ատեստավորում անցած մարզադպրոցների մարզիչ-դասախոսների մասնաբաժինը
• Դպրոցականների և կրթական հաստատությունների ներգրավվածությունը զանգվածային սպորտային միջոցառումներին

Այս ցուցանիշների համակցությամբ ամենաբարձր միջին արդյունքը գրանցել է Վայոց ձորի մարզը՝ մոտ 27.9%։ Նրան հաջորդում են Կոտայքի մարզը (22.2%) և Գեղարքունիքի մարզը (20.9%)։

Ամբողջական վարկանիշ

Վայոց ձոր — 27.9%
Կոտայք — 22.2%
Գեղարքունիք — 20.89%
Սյունիք — 20.23%
Լոռի — 18.84%
Տավուշ — 18.02%
Շիրակ — 16.45%
Երևան — 12.35%
Արարատ — 12.34%
Արագածոտն — 12.00%
Արմավիր — 9.71%

Download

Վարկանիշի առաջատարների խրախուսում

Վարկանիշում առաջին երեք տեղերը զբաղեցրած մարզերը կամ Երևանը ստանում են սպորտային գույք հետևյալ չափով․

• 8 մլն դրամ — առաջին տեղ

• 5 մլն դրամ — երկրորդ տեղ

• 3 մլն դրամ — երրորդ տեղ

Անհրաժեշտ սպորտային գույքի ցանկը և այն ստացող կազմակերպությունը որոշում են մրցանակային տեղեր զբաղեցրած մասնակիցները։

Վարկանիշը կազմվում և հրապարակվում է ամեն տարի՝ Հայաստանի 2024–2030 թվականների ֆիզիկական կուլտուրայի և սպորտի զարգացման ռազմավարության շրջանակում։