Պատմական ձեռքբերում Հայաստանի համար. Գլեբ Մոսեսովը դուրս եկավ լեռնադահուկային սպորտի Աշխարհի առաջնության եզրափակիչ

Ավստրիայի Զալբախ քաղաքում շարունակվում է 2025 թվականի լեռնադահուկային սպորտի Աշխարհի առաջնությունը։ Հսկա ոլորավայրէջքի որակավորման փուլում, որտեղ մասնակցում էին 133 մարզիկ 59 երկրից, Հայաստանի ներկայացուցիչ Գլեբ Մոսեսովը բարձր արդյունք ցույց տվեց և կարողացավ դուրս գալ եզրափակիչ փուլ։

Մոսեսովը զբաղեցրեց 23-րդ հորիզոնականը՝ երկու վայրէջքների արդյունքում ցույց տալով 1:46.85 ընդհանուր ժամանակ։ Այս ցուցանիշը նրան թույլ տվեց ընդգրկվել 50 լավագույն մարզիկների շարքում, ովքեր փետրվարի 14-ին կպայքարեն աշխարհի առաջնության մեդալների համար։

Սա պատմական ձեռքբերում է Հայաստանի համար. Գլեբ Մոսեսովը դարձավ առաջին հայ մարզիկը, որին հաջողվեց հաղթահարել լեռնադահուկային սպորտի աշխարհի առաջնության որակավորման փուլը։ Շնորհավորում ենք Գլեբին այս մեծ հաջողության համար և մաղթում ենք հաղթական ելույթ եզրափակիչում։

Եզրափակիչը կկայանա փետրվարի 14-ին։

Նշենք նաև, որ Հայաստանի հավաքականի ևս մեկ ներկայացուցիչ՝ Հարություն Հարությունյանը, որակավորման փուլը եզրափակեց 58-րդ տեղում։