Իրակլի Եգոյանը կշարունակի կարիերան Էրեդիվիզիում

21-ամյա կիսապաշտպան Իրակլի Եգոյանը, ով ունի վրացական և հայկական արմատներ, պաշտոնապես միացավ «Էքսելսիոր Ռոտերդամին»։ Ֆուտբոլիստը կնքեց պայմանագիր Էրեդիվիզիի ակումբի հետ մինչև 2028 թվականը։

Անցած մրցաշրջանում Եգոյանը հանդես է եկել «Վիտեսսի» կազմում Eerste Divisie-ում՝ խփելով 8 գոլ և կատարելով 5 գոլային փոխանցում։ «Էքսելսիորի» տեխնիկական մենեջեր Նիլս վան Դյույնենի խոսքով՝ տրանսֆերը հնարավոր դարձավ «Վիտեսսի» իրավիճակի շնորհիվ, իսկ Եգոյանը թիմին կհաղորդի «ստեղծարարություն և ֆուտբոլային ինտելեկտ»։

Եգոյանը բնութագրեց իրեն որպես ժամանակակից box-to-box կիսապաշտպան.

«Սիրում եմ հարձակվել, բայց նաև օգնել պաշտպանությանը։ Կարծում եմ՝ ունեմ գոլային հոտառություն, միշտ ուզում եմ խփել։ Ամենակարևորը՝ թիմի և ակումբի համար ամեն ինչ կտամ», — ասաց ֆուտբոլիստը։

Կիսապաշտպանը նշեց, որ զգում է նոր ակումբի վստահությունը և կարծում է՝ այս տեղափոխությունը կարիերայում ճիշտ քայլ է։ Նրա համար Էրեդիվիզիի դեբյուտային մրցաշրջանը կլինի կարևոր փորձություն։

Ավելի վաղ ԶԼՄ-ները Եգոյանին կապում էին Հայաստանի հավաքական հրավերի հետ, սակայն առայժմ նա շարունակում է հանդես գալ Վրաստանի Մ-21 հավաքականում։