«Ինտերը» հաղթանակ կորզեց «Յուվենտուսից»՝ 3:2
- Հեղինակ: Vahe Hakobyan
- Sportaran
Միլանի «Ինտերը» Սերիա Ա-ի 25-րդ տուրի խաղում դրամատիկ պայքարում 3:2 հաշվով առավելության հասավ «Յուվենտուսի» նկատմամբ։
Հանդիպումը հարուստ էր իրադարձություններով։ Դեռ առաջին խաղակեսում թուրինցիների պաշտպան Անդրեա Կամբյասոն աչքի ընկավ երկու դրվագով․ նախ նա ինքնագոլ գրանցեց, ապա վերականգնվեց՝ գրավելով մրցակցի դարպասը։
42-րդ րոպեին «Յուվենտուսը» մնաց տասը խաղացողով․ Պյեր Կալուլուն 1:1 հաշվի պայմաններում ստացավ երկրորդ դեղին քարտը և հեռացվեց խաղադաշտից, ինչը լրջորեն բարդացրեց հյուրերի խնդիրը։
Ընդմիջումից հետո «Ինտերը» կարողացավ օգտվել թվային առավելությունից։ Ֆրանչեսկո Պիո Էսպոզիտոն առաջ մղեց միլանցիներին, սակայն թուրինցիները չհանձնվեցին։ 83-րդ րոպեին Մանուել Լոկատելլին հավասարեցրեց հաշիվը՝ վերականգնելով ինտրիգը։
Թվում էր՝ հանդիպումն ավարտվելու է ոչ-ոքի, սակայն վերջնական խոսքը տանտերերինն էր։ Պետր Զելինսկին հզոր հարվածով հաղթանակ պարգևեց «Ինտերին»՝ 3:2։
Հայ կիսապաշտպան Հենրիխ Մխիթարյանը մնաց պահեստայինների նստարանին։ Նա պետք է խաղադաշտ դուրս գար 82-րդ րոպեին՝ փոխարինելով Մարկուս Թյուրամին, սակայն փոխարինման պահին «Յուվենտուսը» հավասարեցրեց հաշիվը, և մարզչական շտաբը փոխեց որոշումը․ նրա փոխարեն խաղադաշտ դուրս եկավ Բոննին։
Այս հաղթանակը ամրապնդեց «Ինտերի» դիրքերը Սերիա Ա-ի մրցաշարային աղյուսակում և թույլ տվեց թիմին շարունակել պայքարը չեմպիոնության համար։
Քննարկեք նորությունները!
Անցնել մեկնաբանություններին ↓
Comments
0