«Ինտերը»՝ ամենամխիթարյանական թիմը Եվրոպայում

Խորհրդանշական փոխանցումն արդեն կայացել է։ Այժմ Միլանի «Ինտերը» պաշտոնապես դառնում է այն ակումբը, որտեղ Հենրիխ Մխիթարյանը անցկացրել է ամենաշատ հանդիպումները իր եվրոպական կարիերայում։

«Վերոնայի» դեմ խաղը դարձավ հայ կիսապաշտպանի 141-րդը «ներաձուրրիների» կազմում։ Այսպիսով, «Ինտերը» գերազանցեց Դորտմունդի «Բորուսիային» (140 խաղ), որը երկար ժամանակ համարվում էր Հենրիխի գլխավոր «եվրոպական» ակումբը։ Այժմ այդ պատվավոր տիտղոսը անցնում է Սիմոնե Ինձագիի թիմին։

Մխիթարյանը արդեն երրորդ մրցաշրջանն է անցկացում միլանյան գրանդի կազմում։ Այս ընթացքում նա ոչ միայն հարմարվել է, այլ դարձել է թիմի առանցքային խաղացողներից մեկը։ Նա պարբերաբար հայտնվում է մեկնարկային կազմում, ցուցադրում է բարձր մակարդակ և այն կայունությունը, որը գնահատում են թե՛ մարզիչը, թե՛ երկրպագուները։

Իր հագեցած կարիերայի ընթացքում Մխիթարյանը հանդես է եկել մի շարք եվրոպական ակումբներում և ամեն մեկում թողել վառ հետք։ «Շախտյորում» նա դարձել էր լավագույն ռմբարկու, «Բորուսիայում»՝ փայլել 2015/16 մրցաշրջանում, Անգլիայում՝ նվաճել Եվրոպայի լիգան «Մանչեսթեր Յունայթեդի» հետ և աչքի ընկել «Արսենալում», իսկ «Ռոմայում» դարձել էր թիմի առաջատարը՝ հաղթելով Կոնֆերենցիայի լիգան։ Բայց թվում է՝ հենց «Ինտերում» նա գտել է կատարյալ հավասարակշռություն փորձի, ֆիզիկական պատրաստվածության և թիմային համակարգում ունեցած դերակատարության միջև։

Ահա ինչպես է դասավորվում ակումբների ցուցակը՝ Մխիթարյանի անցկացրած խաղերի քանակով․

• Ինտեր — 141 խաղ

• Բորուսիա Դորտմունդ — 140 խաղ

• Ռոմա — 117 խաղ

• Շախտյոր Դոնեցկ — 106 խաղ

• Մանչեսթեր Յունայթեդ — 63 խաղ

• Արսենալ — 59 խաղ

• Փյունիկ — 47 խաղ

• Մետալուրգ Դոնեցկ — 45 խաղ

Հաջորդ քայլը Չեմպիոնների լիգայի կիսաեզրափակիչն է «Բարսելոնայի» դեմ՝ արդեն երեքշաբթի՝ մայիսի 6-ին։ Սա կլինի Մխիթարյանի 142-րդ հանդիպումը «Ինտերի» կազմում և, հնարավոր է, ամենակարևորներից մեկը նրա ակումբային կարիերայում։