Hype Fighting-ը նոր մրցաշար կանցկացնի Երևանում

Hype Fighting լիգան պաշտոնապես հայտարարել է Երևանում ևս մեկ միջազգային մրցաշարի անցկացման մասին, ինչպես նաև բացահայտել է 2026 թվականին նախատեսվող առաջիկա միջոցառումների ամսաթվերը։ Կազմակերպիչները շարունակում են ընդլայնել մրցաշարերի աշխարհագրությունը և շեշտը դնել մեդիայում հայտնի ու աստղային մարզիկների մասնակցության վրա։

2026 թվականի առաջին մրցաշարը կկայանա մարտի 3-ին՝ Ռիո դե Ժանեյրոյում (Բրազիլիա)։ Բրազիլական իվենտի մասնակիցները դեռևս չեն հայտարարվել, սակայն լիգայում նշում են, որ քարտը կհագեցվի բարձրակարգ անուններով։

Երկրորդ մրցաշարը կանցկացվի մարտի 29-ին՝ Երևանում, որը կրկին կդառնա Hype Fighting-ի առանցքային հարթակներից մեկը։ Հիշեցնենք, որ լիգայի նախորդ մրցաշարը Հայաստանի մայրաքաղաքում կայացել էր դեկտեմբերի 30-ին, որտեղ գրեփլինգի մենամարտում հանդես էր եկել MMA-ի գլխավոր աստղերից մեկը՝ Արման Ծառուկյանը, որը հանդիպել էր Շառա Բուլլեթին։

Երևանում սպասվող մրցաշարի համար արդեն հաստատվել է ամենասպասված մենամարտերից մեկը՝ գրեփլինգի դիմակայությունը Դիլոն Դենիսի և Մագոմեդ «Չանկո» Զայնուկովի միջև։

Դիլոն Դենիսը ունի հայկական արմատներ․ նրա հայրը հայ է, իսկ մայրը՝ հոնդուրասցի։ Խառը մենամարտերում նա անցկացրել է երեք մենամարտ և տարել երեք հաղթանակ (ռեկորդ՝ 3–0)՝ հանդես գալով Bellator-ում։ Սակայն առավել մեծ ճանաչում Դենիսը ձեռք է բերել գրեփլինգում, բրազիլական ջիու-ջիցուում, բռնցքամարտում և POP-MMA-ում, որտեղ նա հաճախ մասնակցում է մեդիայում լայն արձագանք ունեցող դիմակայությունների։

Ակնկալվում է, որ Երևանում կայանալիք մրցաշարի քարտը կհամալրվի նաև այլ աստղային մասնակիցներով, որոնց մասին լիգան կհայտարարի մոտ ժամանակներս։

Hype Fighting-ը շարունակում է ակտիվորեն զարգացնել դիտարժան մենամարտերի ձևաչափը և ամրապնդել Հայաստանի դիրքերը՝ որպես միջազգային մարտարվեստների կարևոր հարթակ։