Հարվի Սարաջյան — MLS դրաֆթի 5-րդ ընտրություն և Orlando City-ի նորեկ

Հարձակողական կիսապաշտպան Հարվի Սարաջյանը ընտրվել է MLS դրաֆթի 5-րդ համարով և պաշտոնապես միացել է Orlando City-ին։ Սա վերջին տարիների ամենաբարձր դրաֆթային ընտրություններից մեկն է, ինչպես նաև Օռլանդոյի ակումբի առաջին ընտրությունը ընթացիկ դրաֆթում, ինչը ընդգծում է ակումբի բարձր վստահությունը երիտասարդ ֆուտբոլիստի նկատմամբ։

Սարաջյանի մասին մենք ավելի վաղ մանրամասն գրել ենք — նյութին կարող եք ծանոթանալ ԱՅՍՏԵՂ։

5-րդ համարով ընտրվելը չափազանց լուրջ իրադարձություն է։ Համեմատության համար՝ նախորդ տարվա 5-րդ ընտրություն Ռիդ Ռոբերտսը ընթացիկ մրցաշրջանում արդեն անցկացրել է 14 հանդիպում MLS-ում, ինչը ցույց է տալիս, թե ինչ հնարավորություններ են սովորաբար ստանում նման բարձր ընտրությամբ ֆուտբոլիստները։

Սարաջյանը հարձակողական կիսապաշտպան է՝ տպավորիչ ֆիզիկական տվյալներով, ով կարող է խաղալ ինչպես «տասնյակի» դիրքում, այնպես էլ եզրերում։ Նա վառ ուղի է անցել համալսարանական ֆուտբոլում՝ հանդես գալով Georgia Southern-ում, ապա Wake Forest-ում, ինչպես նաև մասնակցել է MLS College Showcase-ին, որտեղ վերջնականապես հայտնվել է լիգայի ակումբների ուշադրության կենտրոնում։

Orlando City-ի համար սա ներդրում է մի խաղացողի մեջ, ով արդեն այժմ պատրաստ է մրցակցել առաջին թիմի մակարդակում և ապագայում կարող է դառնալ հարձակման կարևոր օղակ։

Հիշեցնենք, որ Յուրա Մովսիսյանը 2006 թվականին նույնպես ընտրվել է շատ բարձր՝ MLS դրաֆթի 4-րդ համարով Kansas City ակումբի կողմից և հետագայում դարձել է լիգայի պատմության ամենանշանավոր հայ ֆուտբոլիստներից մեկը։

Հարվի Սարաջյանի ընտրությունը 5-րդ համարով ևս մեկ կարևոր քայլ է ամերիկյան ֆուտբոլում հայկական արմատներ ունեցող խաղացողների համար և լուրջ հայտ՝ վառ ապագայի համար MLS-ում։