Խաչանովը հինգ սեթում ռևանշ վերցրեց Միքելսենից Australian Open-ում

Ռուսաստանը ներկայացնող, հայկական ծագմամբ թենիսիստ Կարեն Խաչանովը հաջող մեկնարկ ունեցավ Ավստրալիայի բաց առաջնությունում՝ առաջին շրջանի երկարատև և լարված հանդիպման ընթացքում կամային հաղթանակ տանելով։ ԱՄՆ ներկայացուցիչ Ալեքս Միքելսենի հետ հանդիպումը տևեց գրեթե չորս ժամ և ավարտվեց Խաչանովի հաղթանակով՝ 4:6, 6:4, 6:3, 5:7, 6:3։

29-ամյա մարզիկը, ով զբաղեցնում է ATP-ի համաշխարհային վարկանիշի 18-րդ հորիզոնականը, կարողացավ ռևանշ վերցնել ամերիկացուց՝ նախորդ տարվա Australian Open-ի երրորդ շրջանում կրած պարտության համար։ Այս անգամ Խաչանովը ցուցադրեց իր բնավորությունը՝ դիմանալով ֆիզիկապես ծանր հինգսեթանոց մենամարտին և վճռորոշ սեթում փոխելով խաղի ընթացքը։

Մելբուրնում կայանալիք մրցաշարի երկրորդ փուլում Խաչանովը կմրցի ԱՄՆ ևս մեկ ներկայացուցիչ Նիշեշ Բասավարեդդիի հետ, ով զբաղեցնում է ATP-ի վարկանիշի 242-րդ տեղը։ Հատկանշական է, որ Բասավարեդդին մարզվում է Ժիլ Սերվարայի ղեկավարությամբ, ով նախկինում աշխատել է Դանիիլ Մեդվեդևի հետ։

Australian Open-ի առաջին խաղային օրը հաղթանակներ տարան նաև այլ ռուս թենիսիստներ։ Դանիիլ Մեդվեդևը առավելության հասավ նիդերլանդացի Յեսպեր դե Յոնգի նկատմամբ, իսկ Անդրեյ Ռուբլյովը հաղթեց իտալացի Մատեո Առնալդիին։

Ավստրալիայի բաց առաջնությունը՝ սեզոնի առաջին «Մեծ սաղավարտ» մրցաշարը, կավարտվի փետրվարի 1-ին։ Այս տարի մրցաշարի մրցանակային ֆոնդը հասել է ռեկորդային 74,9 միլիոն դոլարի։ Տղամարդկանց մենախաղի հաղթողը կստանա 2,79 միլիոն դոլար, իսկ եզրափակչի մասնակիցը՝ 1,44 միլիոն։ Մրցաշարի գործող չեմպիոնն է աշխարհի երկրորդ ռակետ, իտալացի Յաննիկ Սիները։