Գունկո. «Հայաստանի հավաքականի կազմը դեռ չի հայտարարվել՞։ Նրանք սպասում են Կալուկյանին»

«Ուրարտուի» գլխավոր մարզիչ Դմիտրի Գունկոն մամուլի ասուլիսում՝ «Փյունիկի» նկատմամբ 3-0 հաշվով տարած հաղթանակից հետո, կարծիք հայտնեց թիմի նորեկ Նիկոլաս Կալուկյանի մասին և նրա խաղը կապեց Հայաստանի հավաքականի կազմի հրապարակման ձգձգման հետ՝ Ազգերի լիգայի Վրաստանի դեմ հանդիպման համար։

Գունկոյի կարծիքով, Հայաստանի հավաքականի նոր գլխավոր մարզիչ Ջոն վան'թ Սխիպը ցանկանում է ուշադիր ուսումնասիրել 22-ամյա հարձակվողի խաղը, ով մինչ վերջերս հանդես էր գալիս միայն ԱՄՆ-ի համալսարանական և սիրողական լիգաներում։ Այնուամենայնիվ, Կալուկյանը հաջողությամբ խաղացել է Հայաստանի Մ-21 հավաքականում և արդեն երկու խաղում դարձել է գոլի և գոլային փոխանցման հեղինակ Հայաստանի Պրեմիեր Լիգայում։

«Փյունիկի» դեմ խաղում Կալուկյանը վստահ հանդես եկավ Հայաստանի հավաքականի ավագ Վարազդատ Հարոյանի դեմ, ինչը, Գունկոյի կարծիքով, նրա համար կարևոր փորձություն էր։ Երիտասարդ հարձակվողը ոչ միայն գոլային փոխանցում կատարեց երկրորդ գոլի ժամանակ, այլև մասնակցեց առաջին գոլի ստեղծմանը և մի քանի վտանգավոր պահեր ստեղծեց, այդ թվում՝ կրեատիվ հարվածային փոխանցում դեպի Պալիենկոն։

Ահա Դմիտրի Գունկոյի խոսքերը մամուլի ասուլիսից.

«"Փյունիկի" հետ խաղալը մեզ համար միշտ հետաքրքիր է։ Նրանք ունեն առաջնության լավագույն մարզչական շտաբներից մեկը, ուստի ես այս հանդիպումները կոչում եմ՝ "խելացիության խաղեր"։ Նման հանդիպումներում մենք ունենք մի քանի խաղային պլան, հաճախ վերակառուցվում ենք ընթացքի մեջ։ Այսօր շատ բան ստացվեց մեզ մոտ։ Բրունո Միշելը հիանալի հանդիպում անցկացրեց՝ դարձավ հեթ-տրիկի հեղինակ։ Ես հաճախ չեմ ասում նման բաներ, բայց այսօր նրա սրությունը, մեկի դեմ մենամարտերում հաղթելու կարողությունը երևացին ու մեզ հաղթանակ բերեցին։

(Նիկոլաս Կալուկյանի մասին)

Կարո՞ղ եք պատկերացնել, թե որքան էներգիա են խլում մենամարտերը Վարազդատ Հարոյանի դեմ։ Դա ուժեղ դիմակայություն էր։ Երեկ ես Կալուկյանին ասացի. «Գիտե՞ս, ինչու՞ Հայաստանի հավաքականի կազմը դեռ չի հրապարակվել Վրաստանի դեմ խաղի համար։ Մնացած բոլոր հավաքականներն արդեն հրապարակել են իրենց կազմերը»։ Ես նրան ասացի. «Նրանք սպասում են քեզ։ Ուզում են տեսնել, թե ինչպես ես խաղալու Հայաստանի հավաքականի ավագի՝ Վարազդատ Հարոյանի դեմ»։ Կարծում եմ, որ նա իր խաղով արդարացրեց սպասելիքները և արժանի է հավաքական հրավիրվելու։ Առնվազն դա անակնկալ չի լինի։ Նա մեծ ջանքեր գործադրեց խաղում, բայց նրա օգտակարությունն ավելի լայն էր, քան պարզապես գոլերը։ Մենք հարձակումները կառուցում էինք նրա միջոցով, և նա հիանալի պայքարում էր յուրաքանչյուր գնդակի համար։

Կալուկյանը 100%-ով պատրաստ է Հայաստանի հավաքականին։ Նա արդեն երեք խաղ անընդմեջ խաղացել է մեզ մոտ։ Ոչ մի խնդիր չեմ տեսնում՝ նա պատրաստ է ինչպես ամբողջ հանդիպում անցկացնել, այնպես էլ փոխարինման դուրս գալ ազգային հավաքականի կազմում»։