Գոր Մալաքյանը ավարտեց ֆուտբոլիստի կարիերան և միացավ «Փյունիկի» մարզչական շտաբին

31-ամյա կիսապաշտպանն ու Երևանի «Արարատի» ավագ Գոր Մալաքյանը որոշում է կայացրել ավարտել ֆուտբոլիստի կարիերան և դարձել է «Փյունիկի» գլխավոր մարզիչ Արտակ Օսեյանի օգնական։ Այսպիսով, Գորը պատրաստվում է մարզել իր ավագ եղբորը՝ Էդգար Մալաքյանին, ով շարունակում է հանդես գալ «Փյունիկում»։

Գոր Մալաքյանը Հայաստանի առաջնությունում անցկացրել է ավելի քան 250 խաղ՝ պաշտպանելով «Արարատի», «Փյունիկի», «Արարատ-Արմենիայի», «Շիրակի» և «Ալաշկերտի» գույները։ Նա երկու մրցաշրջան ևս հանդես է եկել Ուկրաինայի առաջնությունում՝ «Ստալ» ակումբի կազմում։

2016-2019 թվականներին Մալաքյանը Հայաստանի ազգային հավաքականի հիմնական խաղացողներից էր և անցկացրել է 18 հանդիպում։

Մալաքյանի հետ միասին Արտակ Օսեյանի մարզչական շտաբում ընդգրկվել են նաև Արթուր Ավագյանը, Արթուր Մկրտչյանը և Գուրգեն Հակոբյանը։

Հիշեցնենք, որ նախկին մարզչական շտաբը՝ Եղիշե Մելիքյանի գլխավորությամբ, լքել է «Փյունիկը» և այժմ ղեկավարում է Հայաստանի հավաքականը։