Հայաստանի հավաքականի դարպասապահ Չանչարևիչը կշարունակի կարիերան Սերբիայում

Հայաստանի ազգային հավաքականի և Երևանի «Նոա» ակումբի դարպասապահ Օգնյեն Չանչարևիչը (Ognjen Čančarević) լքում է Հայաստանի առաջնությունը և կշարունակի կարիերան հայրենիքում՝ Սերբիայում։

36-ամյա դարպասապահը պայմանագիր կստորագրի «ԻՄՏ» ակումբի (Նովի Բելգրադ) հետ, որը Սերբիայի առաջնության 20 տուրից հետո զբաղեցնում է 12-րդ հորիզոնականը։ Տրանսֆերը կկայանա ազատ գործակալի կարգավիճակով․ կողմերը արդեն կարգավորել են գործարքի բոլոր ձևականությունները։

Մոտ ժամանակներս Չանչարևիչը կմեկնի Անթալիա, որտեղ «ԻՄՏ»-ն անցկացնում է ձմեռային ուսումնամարզական հավաքը։

Հիշեցնենք, որ Չանչարևիչը Հայաստանում անցկացրել է ինը տարի՝ հանդես գալով «Ալաշկերտ» և «Նոա» ակումբներում։ 2023 թվականին սերբ ֆուտբոլիստը ստացել է Հայաստանի քաղաքացիություն և նորամուտը նշել ազգային հավաքականում, որի կազմում մինչ այս պահը անցկացրել է 20 հանդիպում։

Հայաստան տեղափոխվելուց առաջ Օգնյենը հանդես է եկել Սերբիայի Բարձրագույն լիգայում՝ պաշտպանելով «Ռադնիկ», «ՕՖԿ», «Մլադոստ» և «Ռադնիչկի 1923» ակումբների գույները։