Դարպասապահի գոլ և խելահեղ հանգուցալուծում․ «Բենֆիկան» հաղթեց «Ռեալին» և անցավ Չեմպիոնների լիգայի փլեյ-օֆֆ

Լիսաբոնի «Բենֆիկան» անցկացրեց Չեմպիոնների լիգայի լիգայական փուլի ամենադրամատիկ հանդիպումներից մեկը՝ 4:2 հաշվով հաղթելով Մադրիդի «Ռեալին» և բառացիորեն վերջին վայրկյանին հայտնվելով փլեյ-օֆֆի գոտում։

Ժոզե Մոուրինյոյի թիմը 8-րդ տուրին մոտեցել էր մի իրավիճակում, երբ սխալվելու իրավունք այլևս չկար։ Հանդիպման ընթացքում «Բենֆիկան» կարողացավ առաջ անցնել՝ 58-րդ րոպեին հաշիվը դարձնելով 3:2, սակայն դա բավարար չէր. թոփ-24 մտնելու և մրցակիցներին, այդ թվում «Մարսելին», շրջանցելու համար պետք էր ևս մեկ գոլ։

Ժամանակը սպառվում էր, «Ռեալը» պաշտպանվում էր, իսկ մադրիդյան երկրպագուներն արդեն հույս ունեին իրենց համար ընդունելի ելքի վրա։ Սակայն ավելացված ժամանակում տեղի ունեցավ մի բան, որը կարիերայում կարող է պատահել միայն մեկ անգամ։

Վերջին ստանդարտի ժամանակ մրցակցի դարպասի մոտ, «Ռեալի» տուգանային հրապարակ մտավ «Բենֆիկայի» դարպասապահ Անատոլի Տրուբինը։ Տուգանայինից կատարված փոխանցումից հետո ուկրաինացի դարպասապահը հաղթեց օդային պայքարում և հզոր գլխի հարվածով գնդակը ուղարկեց Տիբո Կուրտուայի դարպասի ցանցը՝ 4:2։ Ստադիոնը պայթեց ուրախությունից, լիսաբոնյանների պահեստայինների նստարանը վազեց խաղադաշտ, իսկ Տրուբինը մի ակնթարթում դարձավ երեկոյի հերոսը։

Այս գոլը ոչ միայն վերջակետ դրեց հանդիպմանը, այլ նաև շրջեց պորտուգալական ակումբի մրցաշարային ճակատագիրը։

«Բենֆիկան» իր դարպասապահի գոլի շնորհիվ հասցրեց մտնել փլեյ-օֆֆի գոտի, և այս հանդիպումն արդեն կարելի է անվանել ընթացիկ խաղարկության ամենախելահեղ պատմություններից մեկը։ «Ռեալը» այս պարտության պատճառով իջավ 9-րդ տեղ և կխաղա անցումային խաղերում։

Չեմպիոնների լիգայի հիմնական փուլի վերջնական աղյուսակ
Առաջին 8 թիմերը անմիջապես անցնում են 1/8 եզրափակիչ։
9–24-րդ տեղերը զբաղեցրած ակումբները կխաղան անցումային հանդիպումներ՝ նրանց միանալու իրավունքի համար։