«Նոայի» գլխավոր մարզիչ Սանդրո Պերկովիչ․ «Բոլոր վատ բաները իմ մեղքն են»

Օգոստոսի 14-ին Աբովյանում «Նոան» ավարտեց իր ելույթը Եվրոպայի լիգայի որակավորման փուլում՝ պատասխան խաղում երրորդ փուլի Gibraltar-ի «Լինքոլնի» դեմ պարտվելով 11 մետրանոցների սերիայում։ Հիմնական և լրացուցիչ ժամանակում հաղթող չէր որոշվել, իսկ 11 մետրանոցներում ավելի ճշգրիտ էին հյուրերը։

Այժմ «Լինքոլնը» Եվրոպայի լիգայի փլեյ-օֆֆ փուլում կմրցի Պորտուգալիայի «Բրագայի» հետ, իսկ «Նոան» կշարունակի պայքարը Կոնֆերենցիաների լիգայում՝ հանդիպելով Սլովենիայի «Օլիմպիա Լյուբլյանայի» հետ։

Խաղից հետո «Նոայի» գլխավոր մարզիչ Սանդրո Պերկովիչը նշեց, որ իր թիմն ունեցել է մի քանի հրաշալի հնարավորություն, սակայն չի կարողացել դրանք իրացնել․

«Ցավոք, մենք չկարողացանք իրացնել մեր 5–6 հստակ պահերը։ Նրանց հաջողվում էր պահել պաշտպանությունը։ 11 մետրանոցների ժամանակ նրանք ավելի հաջողակ էին։ Ուզում եմ շնորհակալություն հայտնել բոլոր երկրպագուներին, ովքեր եկել էին մարզադաշտ։ Հույս ունեմ, որ նրանք կգան նաև ապագայում։

Դեռ վաղ է խոսել դասերի մասին․ պետք է վերլուծենք։
Մենք խոսեցինք խաղացողների հետ, և Էտեկին համաձայնեց վերցնել պատասխանատվությունը։ Ես որևէ մեղադրանք չունեմ։

Բոլոր վատ բաները իմ մեղքն են, բոլոր լավերը՝ խաղացողների արժանիքը։ Շատ դժվար է ինձ համար, բայց նման պահերը ֆուտբոլի մասն են։ Այսօր կարող ենք տխրել, բայց վաղը պետք է արդեն պատրաստվենք «Գանձասարի» դեմ խաղին»։