Գևորգ Դիարբյանը երկրորդ խաղն անցկացրեց «Նյու Ինգլենդի» կազմում և կրկին մասնակցեց գոլային դրվագին (ՏԵՍԱՆՅՈՒԹ)

23-ամյա հայ կիսապաշտպան Գևորգ Դիարբյանը շարունակում է վստահությամբ դրսևորվել MLS-ի «Նյու Ինգլենդ Ռևոլյուշնի» հիմնական կազմում։ ԱՄՆ Գավաթի (US Open Cup) 1/16 եզրափակչում՝ «Չիկագո Ֆայերի» դեմ խաղում, նա անցկացրեց իր երկրորդ հանդիպումը թիմի կազմում։

Դիարբյանը փոխարինման դուրս եկավ խաղի 67-րդ րոպեին, սակայն «Նյու Ինգլենդը» չկարողացավ խուսափել պարտությունից՝ հանդիպումն ավարտվեց 1:3 հաշվով։ Այդուհանդերձ, հենց հայ ֆուտբոլիստն էր մասնակցում թիմի միակ գոլին. 89-րդ րոպեին նա հզոր անհատական անցումով անցավ եզրով և հարվածեց դարպասին։ Գնդակը բախվեց «Չիկագոյի» պաշտպան Ջասթին Ռեյնոլդսին և հայտնվեց դարպասում՝ գոլը գրանցվեց որպես ինքնագոլ։

Նշենք, որ նախորդ խաղում ևս Դիարբյանը՝ դաշտ դուրս գալով 87-րդ րոպեին, առանցքային մասնակցություն ունեցավ թիմի հաղթական գոլում՝ նրա փոխանցումից հետո գնդակը հարվածեց դարպասաձողին, իսկ հետո հարձակվողը գրավեց դարպասը։ Այսպիսով, իր առաջին երկու հանդիպումներում Գևորգ Դիարբյանը երկու անգամ ակտիվորեն մասնակցել է գոլային դրվագներին, չնայած պաշտոնական վիճակագրությունում գոլային գործողություններ չունի։

ՏԵՍԱՆՅՈՒԹ խաղից (եթե YouTube-ը ձեզ մոտ չի աշխատում, կարող եք դիտել Telegram-ում)։