Գեորգի Հարությունյանը սեզոնը եզրափակեց Հունգարիայում արծաթե մեդալով և եվրագավաթներում կներկայանա

Հայաստանի ազգային հավաքականի պաշտպան Գեորգի Հարությունյանը հաջողությամբ ավարտեց իր առաջին սեզոնը հունգարական «Պուշկաշ Ակադեմիա» ակումբում՝ դառնալով առաջնության փոխչեմպիոն: Հաջորդ մրցաշրջանում 20-ամյա ֆուտբոլիստը ակումբի հետ միասին առաջին անգամ հանդես կգա եվրագավաթային մրցաշարերում՝ թիմը կմեկնարկի ՈւԵՖԱ-ի Կոնֆերենցիաների լիգայի որակավորման երկրորդ փուլից։

Հարությունյանը միացավ «Պուշկաշ Ակադեմիա»-ին 2025 թ․ ձմռանը՝ տեղափոխվելով «Կրասնոդար»-ից և անցկացրեց 15 խաղ, գրանցելով մեկ գոլային փոխանցում։ Հետաքրքիր է, որ մրցաշրջանի ընթացքում նա ցուցաբերեց բազմակողմանիություն՝ սկսելով որպես կենտրոնական պաշտպան, այնուհետև հանդես գալով ձախ պաշտպանի դերում, իսկ մրցաշրջանի ավարտին խաղալով նաև հենակետային կիսապաշտպանի դիրքում։

Հաջող մեկնարկն արտասահմանյան առաջնությունում և սպասվող եվրագավաթային փորձը 2024/25 մրցաշրջանը դարձնում են նշանակալի փուլ երիտասարդ հայ ֆուտբոլիստի կարիերայում։

Նշենք նաև, որ նրա ծննդավայրի ակումբը՝ «Կրասնոդար»-ը, այս մրցաշրջանում առաջին անգամ դարձավ Ռուսաստանի չեմպիոն։ Ինքը՝ Հարությունյանը, մրցաշրջանը սկսել է ռուսական ակումբում, սակայն խաղացել է միայն Ռուսաստանի Գավաթի խաղարկությունում, ուստի չեմպիոնական մեդալ չի ստանա։