Հենրիխ Մխիթարյանը բացատրել է, թե ինչու ավարտեց իր կարիերան Հայաստանի հավաքականում՝ իր ինքնակենսագրական գրքում

«Ինտերի» հայ կիսապաշտպան Հենրիխ Մխիթարյանը ներկայացրել է իր ինքնակենսագրական գիրքը՝ «La mia vita sempre al centro. Il viaggio di un ragazzo armeno tra determinazione e sacrificio» («Իմ կյանքը միշտ կենտրոնում է։ Հայ տղայի ճանապարհորդությունը վճռականության և զոհողությունների միջով»), որը հրատարակվել է 2025 թվականի հոկտեմբերի 7-ին և արդեն հասանելի է վաճառքում, այդ թվում՝ Amazon-ում։

Գիրքը, գրված իտալերենով, ընդգրկում է ոչ միայն Մխիթարյանի սպորտային ուղին, այլև նրա անձնական մտորումները ընտանիքի, հավատքի և հայրենիքի մասին։ 25 գլուխներից մի քանիսն են՝ «Ես գնում եմ, հայրիկ», «Չմարսվող նախաճաշը Մոուրինյոյի հետ», «Պատուհան՝ Արարատ լեռան տեսարանով (քանի որ ցեղասպանությունը չի կարելի մոռանալ)», «Համլետ, Հռոմի որդին» և եզրափակիչ «Հայաստանի համար։ Հայաստանի հետ»։

«Հայաստանի համար։ Հայաստանի հետ» գլխում Մխիթարյանը առաջին անգամ անկեղծորեն անդրադարձել է իր հավաքականից հեռանալու որոշմանը՝ բացատրելով պատճառները․

«Իմ հիասքանչ ճանապարհորդությունը հավաքականի հետ տևեց գրեթե տասնհինգ տարի և ավարտվեց 2021 թվականի նոյեմբերի 14-ին՝ Երևանում՝ Գերմանիայից 1:4 հաշվով պարտությամբ։ Մարդիկ դեռ չէին գիտակցում, որ դա իմ վերջին խաղն էր։ Պաշտոնական հայտարարությունը հայտնվեց մի քանի օր անց։ Բայց ես ինքս արդեն զգում էի, որ ժամանակն էր։ Ոչ թե որովհետև ես ինձ տեղում չէի զգում, այլ որովհետև հասկացա՝ ես հենց այնտեղ եմ, որտեղ պետք է լինեմ»։

Ֆուտբոլիստի խոսքով՝ նա մինչ օրս ստանում է երկրպագուների բազմաթիվ ուղերձներ՝ հավաքական վերադառնալու խնդրանքով, սակայն վերադարձը բացառված է․

«Ես շատ էի մտածում երկրպագուների մասին, որոնք մինչ օրս գրում են ինձ և խնդրում վերադառնալ։ Բայց ես չէի կարող և չէի ուզում վերադառնալ։ Երբևէ հրապարակավ կասեմ՝ ինչու»։

Մխիթարյանը նաև շեշտել է, որ իր հեռանալը ոչ մի կապ չի ունեցել թիմի ներսում հակասությունների հետ․

«Ներսում երբեք չեմ վիճել թիմակիցներիս հետ, չեմ անարգել նրանց։ Ամեն անգամ, երբ կրում էի Հայաստանի մարզաշապիկը, հպարտություն էի զգում»։

Ֆուտբոլիստը ամփոփել է իր միջազգային կարիերան՝ 95 խաղ, 32 գոլ, որոնց թվում՝ երկուական գոլ Իտալիայի և Գերմանիայի հավաքականների դարպասները։

«Գրեթե կես խաղերում ես խաղացել եմ մի դիրքում, որը այնքան էլ սիրելի չէր ինձ։ Բայց երբեք չեմ բողոքել։ Այդպիսին եմ ես»։

Մխիթարյանի ինքնակենսագրությունը արդեն մեծ հետաքրքրություն է առաջացրել երկրպագուների և լրագրողների շրջանում․ այն խոստանում է դառնալ ոչ միայն սպորտային հիշողություն, այլև անկեղծ պատմություն՝ այն մասին, թե ինչպես է հայ ֆուտբոլիստը հասել համաշխարհային ճանաչման՝ հավատարիմ մնալով իր արմատներին։