Հենրիխ Մխիթարյան․ «Ուզում էինք ապացուցել բոլորին, որ կարող ենք հաղթել թոփ-ակումբներին»

Միլանի «Ինտերի» կիսապաշտպան Հենրիխ Մխիթարյանը մեկնաբանել է Դորտմունդի «Բորուսիայի» նկատմամբ արտագնա հաղթանակը (2:0) Չեմպիոնների լիգայի ընդհանուր փուլի վերջին տուրում։ Հայ ֆուտբոլիստը խաղը սկսել է մեկնարկային կազմում և անցկացրել է բոլոր 90 րոպեն՝ իր ներդրումն ունենալով թիմի համար կարևորագույն արդյունքի մեջ։

«Ներաձուրիների» պաշտոնական ռեսուրսներին տված հարցազրույցում Մխիթարյանը ընդգծել է, որ վճռորոշ գործոնը թիմային խաղն էր։

«Մենք հիանալի աշխատանք կատարեցինք որպես մեկ ամբողջություն՝ թե՛ պաշտպանությունում, թե՛ հարձակման գծում։ Ստեղծեցինք մի քանի վտանգավոր պահեր։ Երբեմն թվում էր, որ դա կարող է բավարար չլինել, բայց ի վերջո կարողացանք բացել հաշիվը ստանդարտ դրությունից հետո, և դա մեզ վստահություն տվեց», — նշել է կիսապաշտպանը։

Մխիթարյանի խոսքով՝ գերմանական գրանդի նկատմամբ հաղթանակը կարևոր էր ոչ միայն մրցաշարային, այլև հոգեբանական տեսանկյունից։

«Մենք արժանի էինք այս հաջողությանը։ Ուզում էինք ապացուցել բոլորին, որ «Ինտերը» կարող է հաղթել բարձր մակարդակի թիմերի։ Կարևոր չէ, թե կոնկրետ ով է դուրս գալիս խաղադաշտ — մենք ունենք լայն կազմ, և բոլորը պատրաստ են օգնել։ Մարզումների ժամանակ շատ ենք աշխատում փոխըմբռնման և խաղային կապերի վրա, որովհետև ցանկացած պահի ինչ-որ մեկը կարող է հնարավորություն ստանալ։ Ֆուտբոլում երբեք չգիտես, ինչպես կզարգանա հանդիպումը», — ասել է նա։

Հայ ֆուտբոլիստը նաև խոստովանել է, որ թիմում մնացել է թեթև հիասթափություն նախորդ արդյունքների պատճառով։

«Նախորդ հանդիպումներում մենք միավորներ կորցրինք, և դա, իհարկե, որոշակի հետք թողեց։ Գուցե կարող էինք մի փոքր ավելի լավ հանդես գալ, բայց սա է ֆուտբոլը։ Այժմ մեր ուշադրությունը հաջորդ փուլն է։ Մենք կանենք ամեն ինչ՝ առաջ անցնելու համար, անկախ նրանից՝ ով կլինի մրցակիցը՝ «Բենֆիկան» թե «Բուդյո-Գլիմտը»։ Առաջին հերթին կենտրոնանում ենք մեր խաղի վրա, ոչ թե մրցակիցների», — ընդգծել է Մխիթարյանը։

«Ինտերը» Չեմպիոնների լիգայի լիգային փուլում զբաղեցրել է 10-րդ տեղը և 1/16 եզրափակչում կհանդիպի «Բենֆիկայի» կամ «Բուդյո/Գլիմտի» հետ։ Վիճակահանությունը կկայանա ուրբաթ։