Հենրիխ Մխիթարյանը՝ եզակի պատմական նվաճման հեղինակ. բոլոր երեք եվրագավաթների եզրափակիչները և նոր ռեկորդի շանս

Հենրիխ Մխիթարյանն արդեն պատմություն է գրել եվրոպական ֆուտբոլում։ Այս պահին նա աշխարհում միակ ֆուտբոլիստն է, ով մասնակցել է ՈւԵՖԱ-ի հովանու տակ անցկացվող բոլոր երեք եվրագավաթների՝ Չեմպիոնների լիգայի, Եվրոպայի լիգայի և Կոնֆերենցիաների լիգայի եզրափակիչներին։ Այս փաստը հայ կիսապաշտպանին դարձնում է իսկապես բացառիկ:

Առաջին եզրափակիչը Մխիթարյանը անցկացրել է 2017 թվականին՝ անգլիական «Մանչեսթեր Յունայթեդ»-ի կազմում։ Այդ խաղում, որը տեղի ունեցավ Ամստերդամի «Այաքս»-ի դեմ Եվրոպայի լիգայում, Հենրիխը խաղադաշտում անցկացրեց 74 րոպե և գոլի հեղինակ դարձավ՝ դառնալով հանդիպման հերոսներից մեկը։

Երկրորդ եվրագավաթային եզրափակիչը կայացավ 2022 թվականին, երբ Մխիթարյանը խաղում էր իտալական «Ռոմա»-ում։ Կոնֆերենցիաների լիգայի եզրափակչում «Ֆեյենորդ»-ի դեմ նա մեկնարկեց հիմնական կազմում, բայց ստիպված եղավ լքել խաղադաշտը արդեն 17-րդ րոպեին՝ վնասվածքի պատճառով։

2023 թվականին Մխիթարյանը մասնակցեց եվրոպական ակումբային գլխավոր մրցաշարի՝ Չեմպիոնների լիգայի եզրափակչին։ Նրա ներկայիս ակումբը՝ «Ինտերը», մրցեց «Մանչեսթեր Սիթի»-ի հետ։ Հենրիխը դուրս եկավ փոխարինման 84-րդ րոպեին՝ փակելով իր յուրօրինակ եռապատիկը։ «Ինտերը» պարտվեց 0-1 հաշվով։

Արդեն վաղը այս բացառիկ նվաճումը կարող է կրկնել լեհ Նիկոլա Զալևսկին։ «Ռոմա»-ի կազմում նա արդեն խաղացել է Կոնֆերենցիաների (2022) և Եվրոպայի լիգայի (2023) եզրափակիչներում։ Եթե նա խաղադաշտ դուրս գա վաղվա Չեմպիոնների լիգայի եզրափակչում, կդառնա պատմության մեջ երկրորդ ֆուտբոլիստը նման արդյունքով։ Սակայն Զալևսկին այժմ «Ինտեր»-ի հիմնական խաղացող չի համարվում։

Բայց Մխիթարյանը ևս մեկ բացառիկ արդյունքի հասնելու հնարավորություն ունի։ Եթե «Ինտերը» հաղթի «Փարիզ Սեն-Ժերմեն»-ին 2024/25 մրցաշրջանի Չեմպիոնների լիգայի եզրափակչում, որը կկայանա մայիսի 31-ին Մյունխենի «Ալիանց Արենայում», Հենրիխը կդառնա պատմության մեջ ընդամենը երկրորդ ֆուտբոլիստը, ով հաղթել է բոլոր երեք եվրագավաթները։ Առաջինը դա արել է բրազիլական ծագումով իտալացի Էմերսոնը։ Բայց նույնիսկ Էմերսոնը չի խաղացել բոլոր երեք եզրափակիչներում՝ ի տարբերություն Մխիթարյանի, ով մասնակցել է դրանցից յուրաքանչյուրին։