Մարոկկոյի հավաքականի ֆուտբոլիստ Բուշաիբ Արասին տեղափոխվեց «Արարատ-Արմենիա»

Մարոկկոյի ազգային հավաքականի պաշտպան Բուշաիբ Արասին կշարունակի իր կարիերան Հայաստանի առաջնությունում։ AfricaFoot-ի տեղեկություններով՝ 25-ամյա կենտրոնական պաշտպանն «Արարատ-Արմենիա» ՖԱ-ի հետ պայմանագիր է կնքել վարձակալության հիմունքներով՝ մինչև ընթացիկ մրցաշրջանի ավարտը։

Արասին ունի բարձր մակարդակում հանդես գալու լուրջ փորձ։ 190 սմ հասակ ունեցող պաշտպանը Մարոկկոյի չեմպիոն է դարձել «Ռաջա Կասաբլանկա» ակումբի կազմում, ինչպես նաև անցկացրել է 5 հանդիպում Մարոկկոյի ազգային հավաքականում։ Միաժամանակ նա չի հրավիրվել 2025 թվականի Աֆրիկայի ազգերի գավաթի մրցաշարին։

Պորտալների տվյալների համաձայն՝ պաշտպանի տրանսֆերային արժեքը գնահատվում է 325 հազար եվրո։

Արասիի տեղափոխությունը դարձավ «Արարատ-Արմենիա»-ի առաջին տրանսֆերը ձմեռային տրանսֆերային պատուհանի ընթացքում։ Մանուել Տուլիպայի գլխավորությամբ թիմը վստահորեն գլխավորում է Հայաստանի առաջնությունը մրցաշրջանի առաջին կեսի արդյունքներով։