«Արարատի» ֆուտբոլիստը տեղափոխվեց բելգիական «Գենտ»

Երևանի «Արարատ» ֆուտբոլային ակումբը և բելգիական «Գենտը» համաձայնության են եկել 19-ամյա իվուարցի հարձակվող Բայ Քրիստ Հիլարիոն Գուռի տրանսֆերի շուրջ։ Ֆուտբոլիստը ավարտում է իր ելույթներն «Արարատի» կազմում և տեղափոխվում է Բելգիա։

Գուռը շնորհակալություն է հայտնել «Արարատին» իր զարգացմանը նպաստելու համար.
«Ցանկանում եմ շնորհակալություն հայտնել «Արարատին» այն ամենի համար, ինչ այս ակումբը տվել է ինձ՝ մասնագիտական աճից մինչև մտածելակերպ։ Շնորհակալ եմ նաև բոլոր նրանց, ովքեր մեզ հետ աշխատել են՝ ակումբի ղեկավարությանը, մարզչական շտաբին ու աշխատակիցներին։ Ես իսկապես շատ շնորհակալ եմ ամեն ինչի համար»,- ասել է ֆուտբոլիստը։

«Արարատ» ֆուտբոլային ակումբի գործադիր տնօրեն Տիգրան Ղարաբաղցյանը կարևորել է այս տրանսֆերը.
«Չնայած նրան, որ Քրիստ Գուռը մեր թիմին միացել էր ոչ վաղ անցյալում, նա զգալի ազդեցություն ունեցավ։ Մեզ համար հեշտ չէ բաժանվել նրանից, բայց նման տրանսֆերները հնարավորություն են երիտասարդ տաղանդների համար զարգանալ բարձր մակարդակում։ «Արարատը» մեծ ուշադրություն է դարձնում խոստումնալից ֆուտբոլիստների հետ աշխատանքին, և այս տրանսֆերը դրա ապացույցն է։ Մենք արդեն ֆուտբոլիստներ ենք տեղափոխել Սլովենիայի, Իսրայելի և Բելգիայի ակումբներ, և «Գենտի» հետ այս գործարքը ևս մեկ կարևոր քայլ է։ Իհարկե, սա կորուստ է մեզ համար, բայց այն կօգնի թե՛ ֆուտբոլիստին, թե՛ ակումբին երկարաժամկետ հեռանկարում»։

2024/25 մրցաշրջանում Քրիստ Գուռը «Արարատի» կազմում մասնակցել է Fastex Պրեմիեր լիգայի 14 հանդիպման, դարձել է 6 գոլի և 1 գոլային փոխանցման հեղինակ։ Հարձակվողը միացել էր «Արարատին» այս մրցաշրջանի սկզբում, սակայն արդեն հնարավորություն ստացավ ավելի բարձր մակարդակի տեղափոխության։ «Արարատը» որոշակի գումար կստանա այս տրանսֆերից, սակայն գումարի չափը դեռ չի հրապարակվում։