ՖԱ «Հայք»-ը պաշտոնապես ներկայացրեց Իսաակ Դրոգբային

Հայկական «Հայք» ֆուտբոլային ակումբը պաշտոնապես հայտարարել է իվուարցի հարձակվող Իսաակ Դրոգբայի հետ պայմանագիր կնքելու մասին։ Նա լեգենդար հարձակվող Դիդիե Դրոգբայի որդին է։

25-ամյա ֆուտբոլիստը Լոնդոնի «Չելսիի» ակադեմիայի սան է։ Անգլիական ակումբի համակարգում անցկացրած ժամանակահատվածից հետո նա կարիերան շարունակել է Ֆրանսիայում, որտեղ հանդես է եկել «Գենգամի» կազմում։ Դրոգբա կրտսերի վերջին թիմը եղել է բելգիական «Լա Լուվիերը»։ «Հայքում» հարձակվողը հանդես կգա 22 համարի մարզաշապիկով։

Ավելի վաղ Sportaran-ը արդեն հայտնել էր խաղացողի տեղափոխության մասին հայկական թիմ, իսկ այժմ ակումբը պաշտոնապես ներկայացրել է նորեկին։

Հատկանշական է, որ Դրոգբան արդեն ընդգրկված էր «Հայքի» հայտացուցակում Առաջին լիգայի 18-րդ տուրի խաղում, որը կայացել է մարտի 2-ին։ Այդ հանդիպմանը հարձակվողը խաղադաշտ դուրս չի եկել, սակայն նրա ընդգրկումը խաղի արձանագրությունում հաստատել է, որ ֆուտբոլիստը արդեն գտնվում է թիմի տրամադրության տակ։

Իսաակ Դրոգբան, ինչպես իր հայտնի հայրը, հանդես է գալիս կենտրոնական հարձակվողի դիրքում, սակայն զիջում է նրան ֆիզիկական տվյալներով․ նրա հասակը 178 սմ է։ Չնայած իր հայտնի ազգանվանը, նա մեծահասակների մակարդակում դեռևս չի կարողացել բարձրաձայն հայտարարել իր մասին։ Ավելի վաղ Դրոգբա կրտսերը խաղացել է Իտալիայի Սերիա D-ում, ինչպես նաև Բելգիայի առաջնության չորրորդ դիվիզիոնում։