Ֆին Գերագուսյանը հետաքրքրել է «Ռեքսհեմին» և մի շարք եվրոպական ակումբների

18-ամյա հարձակվող «Սանդերլենդի» Ֆին Գերագուսյանը հայտնվել է Չեմփիոնշիպի «Ռեքսհեմ» ակումբի հետաքրքրության շրջանակում, հաղորդում է Sunderland Echo-ը։

Ուելսյան ակումբը, որը պատկանում է Ռայան Ռեյնոլդսին և Ռոբ ՄակԷլհեննիին, նախատեսում է ուժեղացնել իր ակադեմիան «Սանդերլենդի» միանգամից երկու ֆուտբոլիստներով՝ Գերագուսյանով և Ջենսոն Ջոնսով։ Միևնույն ժամանակ «Ռեքսհեմը» ընթացիկ մրցաշրջանում պայքարում է Պրեմիեր լիգա դուրս գալու համար։

Գերագուսյանը հանդես է գալիս «Սանդերլենդում» կրթաթոշակային պայմանագրով, որի ժամկետը ավարտվում է այս ամռանը։ Եթե կողմերը չհասնեն պրոֆեսիոնալ պայմանագրի համաձայնության, ֆուտբոլիստը կարող է տեղափոխվել այլ ակումբ մոտ 200 հազար եվրոյի փոխհատուցմամբ։

Բրիտանացի լրագրող Քրեյգ Հոուպի տվյալներով՝ հայ հարձակվողի նկատմամբ հետաքրքրություն են ցուցաբերում նաև «Նոթինգհեմ Ֆորեստը», «Ռեյնջերսը» և մի շարք այլ եվրոպական ակումբներ, հիմնականում՝ ակադեմիական տարբերակներով։

Միևնույն ժամանակ «Սանդերլենդը» մտադիր է պահել խաղացողին և արդեն բանակցություններ է վարում նրա հետ պրոֆեսիոնալ պայմանագիր կնքելու և հետագա վարձակալության վերաբերյալ։

Ընթացիկ մրցաշրջանում 194 սմ հասակ ունեցող հարձակվողը «Սանդերլենդի» մինչև 18 և մինչև 21 տարեկանների թիմերում անցկացրած խաղերում խփել է 13 գոլ և կատարել 3 գոլային փոխանցում։

Ավելի վաղ Գերագուսյանը առաջին անգամ հրավիրվել է Հայաստանի ազգային հավաքական և կարող է դեբյուտ անել մարտի 29-ին Բելառուսի դեմ ընկերական խաղում։