Ֆինն Գերագուսյանը գոլ խփեց և օգնեց «Սանդերլենդ U18»-ին դուրս գալ Անգլիայի գավաթի 1/8 եզրափակիչ (ՏԵՍԱՆՅՈՒԹ)

«Սանդերլենդ U18»-ը դուրս եկավ Անգլիայի երիտասարդական գավաթի հինգերորդ փուլ (1/8 եզրափակիչ), դրամատիկ խաղում հաղթելով «Վեստ Բրոմվիչ U18»-ին — 3:3 (4:3՝ հետխաղյա 11 մետրանոցներով):

Հանդիպման գլխավոր դեմքերից մեկը Հայաստանի երիտասարդական հավաքականի հարձակվող Ֆինն Գերագուսյանն էր։ Արդեն 7-րդ րոպեին նա բացեց հաշիվը՝ տպավորիչ հարվածով գնդակը ուղարկելով վերևի ձախ անկյուն՝ մրցակցի պաշտպաններին շրջանցելով նրանց տուգանային հրապարակում։ Շուտով «Սանդերլենդ»-ը կրկնապատկեց առավելությունը, սակայն ընդմիջումից հետո խաղը լիովին փոխվեց։

ԳՈԼԻ ՏԵՍԱՆՅՈՒԹԸ.

Երկրորդ խաղակեսում «սև կատուների» ավագ Ֆինլի Հոլկրոֆտը ստացավ երկրորդ դեղին քարտը, և տանտերերը մնացին տասը հոգով։ «Վեստ Բրոմվիչ»-ը օգտվեց թվային առավելությունից․ Ռիո Պարմարը իրացրեց 11 մետրանոցը, իսկ ավելացված ժամանակում Ջասթին Սևեն-Սևենը հավասարեցրեց հաշիվը — 2:2։

Լրացուցիչ ժամանակում Գերագուսյանը կրկին իրադարձությունների կենտրոնում էր։ Նրա հարվածից հետո դարպասապահը գնդակը հետ մղեց ուղիղ Տրիցիանո Ուիլսոնի դիմաց, որը մոտ տարածությունից այն ուղարկեց ցանց — 3:2՝ «Սանդերլենդ»-ը կրկին առաջ անցավ։

Սակայն ավելի ուշ հայ հարձակվողը խախտեց կանոնները իր տուգանայինում Ռեմարե ՄաքՆիլի նկատմամբ, ստացավ երկրորդ դեղին քարտը և հեռացվեց խաղադաշտից։ Պարմարը կրկին վստահ իրացրեց 11 մետրանոցը — 3:3։

Հանդիպման ճակատագիրը վճռվեց 11 մետրանոցների շարքում, որտեղ հերոս դարձավ դարպասապահ Ջո Քոուենը՝ հետ մղելով երկու հարված։ Վճռորոշ գոլը խփեց Ուիլսոնը՝ ձևակերպելով «Սանդերլենդ»-ի հաղթանակը՝ 4:3 սերիայում։

1/8 եզրափակիչում «Սանդերլենդ U18»-ը տանը կխաղա «Բրայթոն U18»-ի դեմ։