Ֆինն Գերագուսյանը «Սանդերլենդի» հիմնական թիմի հետ մեկնել է Անգլիայի գավաթի խաղին

Ֆինն Գերագուսյանը «Սանդերլենդի» առաջին թիմի հետ մեկնել է Անգլիայի գավաթի արտագնա հանդիպմանը «Օքսֆորդ Յունայթեդի» դեմ։ Հանդիպումն ավարտվել է «սև կատուների» նվազագույն՝ 1:0 հաշվով հաղթանակով։

18-ամյա հարձակվողը վերջնական հայտացուցակում տեղ չի գտել, սակայն հիմնական կազմի հետ ուղևորությունն արդեն իսկ կարևոր քայլ է նրա զարգացման համար։ U21 թիմի մեկ այլ ներկայացուցիչ՝ Ջեք Ուիտակերը, ընդգրկված էր հայտացուցակում, սակայն խաղադաշտ դուրս չի եկել։

Գերագուսյանի համար սա ևս մեկ արժեքավոր փորձ է ակումբի առաջին թիմում։ 194 սմ հասակ ունեցող հարձակվողը աստիճանաբար գրավում է մարզչական շտաբի ուշադրությունը իր արդյունավետությամբ և ֆիզիկական տվյալներով։

Այս մրցաշրջանում Հայաստանի երիտասարդական հավաքականի հարձակվողը «Սանդերլենդի» U21 և U18 թիմերի կազմում խփել է 9 գոլ՝ հաստատելով իր սերնդի ամենահեռանկարային հայ ֆուտբոլիստներից մեկի կարգավիճակը։

Հիմնական թիմի կառուցվածքում առաջին քայլերը ցույց են տալիս, որ Գերագուսյանի առաջընթացը աննկատ չի մնում, և մեծահասակների մակարդակում դեբյուտը կարող է լինել միայն ժամանակի հարց։