ՖԻՖԱ-ն տրանսֆերային արգելք էր սահմանել «Նոա»-ի վրա, սակայն իրավիճակն արդեն կարգավորված է

ՖԻՖԱ-ի կարգապահական կոմիտեն ժամանակավորապես արգելել էր երևանյան «Նոա»-ին գրանցել նոր ֆուտբոլիստներ թե՛ ազգային, թե՛ միջազգային մակարդակներում։ Պատճառն եղել է ակումբի նախկին սեփականատերերի կողմից թույլ տրված խախտումը։

Խոսքը գնում է սանկտպետերբուրգյան «Զենիթ»-ին ֆուտբոլիստ Ալեն Պողոսյանի պատրաստման դիմաց փոխհատուցում չվճարելու մասին։ Թեև ակումբների միջև վեճը կարգավորվել էր դեռ մի քանի տարի առաջ, գործը փակելու համար «Նոա»-ն պետք է անցներ համապատասխանության գնահատման ընթացակարգ և վճարեր 5000 շվեյցարական ֆրանկի չափով տուգանք։

Sportaran.com-ի տեղեկություններով՝ Հայաստանի չեմպիոնը արդեն կատարել է բոլոր անհրաժեշտ պայմանները, ներառյալ տուգանքի վճարումը։ Մոտ ժամանակներս սպասվում է պատժամիջոցների պաշտոնական հանումը։ Այդպիսով՝ տրանսֆերային արգելքը չի խանգարի «Նոա»-ի ամառային տրանսֆերային պլաններին։

Հիշեցնենք, որ «Նոա»-ն, որպես Հայաստանի չեմպիոն, մասնակցելու է Չեմպիոնների լիգայի 2025/26 մրցաշրջանի որակավորման առաջին փուլին, իսկ վիճակահանությունը տեղի է ունենալու հունիսի 17-ին։