ՀՖՖ-ն պատվել է Հայաստանի հավաքականի այն ֆուտբոլիստներին, ովքեր հաջողություններ են գրանցել 2024/25 մրցաշրջանում
Photo: FFA
- Հեղինակ: Vahe Hakobyan
- Sportaran
«Ավան» ֆուտբոլային ակադեմիայի բաց լողավազանի տարածքում կայացել է հանդիսավոր արարողություն՝ նվիրված Հայաստանի ազգային հավաքականի այն ֆուտբոլիստներին, ովքեր աչքի են ընկել 2024/25 ակումբային մրցաշրջանում։ Միջոցառումը նվիրված էր այն խաղացողներին, որոնք իրենց ակումբների կազմում դարձել են չեմպիոններ կամ գավաթակիրներ։ Մարզիկները ՀՖՖ նախագահ Արմեն Մելիքբեկյանից ստացել են հուշանվերներ:
Արարողությանը ներկա են եղել նաեւ ֆուտբոլիստների ընտանիքի անդամներն ու մարզիչները։ Պաշտոնական մասից հետո խաղացողները շփվել են լրատվամիջոցների ներկայացուցիչների հետ, հայտնում է FastNews-ի թղթակիցը։
ՀՖՖ նախագահը պարգևատրել է Հայաստանի չեմպիոններ Արտակ Դաշյանին, Օհանես Համբարձումյանին, Սերգեյ Մուրադյանին եւ Գոր Մանվելյանին, Ռուսաստանի չեմպիոն Էդուարդ Սպերծյանին, Մոլդովայի գավաթակիր Արթուր Սերոբյանին եւ Լեհաստանի գավաթակիր Վահան Բիչախչյանին։
Նշենք, որ Վահան Բիչախչյանը եւ Արտակ Դաշյանը վնասվածքների պատճառով չեն ընդգրկվել Հայաստանի հավաքականի առաջիկա խաղերի կազմում, սակայն ներկա են եղել արարողությանը։
Հայաստանի չեմպիոն եւ գավաթակիր «Նոա»-ի կազմում հանդես եկող Գոր Մանվելյանը նշել է․
«Մրցաշրջանը բարդ էր, բայց մենք կարողացանք այն բարձր նոտայով ավարտել։ “Նոա”-ի հետ մենք նվաճեցինք թե՛ առաջնությունը, թե՛ գավաթը։ Այժմ մեր նոր նպատակն է՝ դուրս գալ Չեմպիոնների լիգայի խմբային փուլ։ Եթե դա չստացվի, կփորձենք հաջողության հասնել Եվրոպա լիգայում կամ Կոնֆերենցիաների լիգայում»։
«Շերիֆ»-ի կազմում Մոլդովայի գավաթակիր դարձած Արթուր Սերոբյանը նշել է․
«Հաճելի էր նվաճել գավաթը, թեեւ ցավալի է, որ չեմպիոն չդարձանք։ Ընդհանրապես, Մոլդովայի եւ Հայաստանի ֆուտբոլի մակարդակները բավականին նման են»։
«Լեգիա»-ի կազմում Լեհաստանի գավաթակիր Վահան Բիչախչյանը պատմել է դժվարությունների մասին․
«Մրցաշրջանի առաջին կեսն անցկացրեցի “Պոգոն”-ում, ապա տեղափոխվեցի “Լեգիա”։ Ցավոք, վնասվածքի ռեցիդիվի պատճառով քիչ խաղաժամանակ ստացա։ Արդեն երեք շաբաթ է՝ բուժման փուլում եմ։ Վերականգնման կեսն արդեն անցել եմ։ Հուսով եմ՝ հաջորդ մրցաշրջանը ավելի հաջող կլինի»։
Հիշեցնենք՝ Հայաստանի հավաքականը հունիսին կանցկացնի երկու ընկերական արտագնա հանդիպում․ հունիսի 6-ին՝ Կոսովոյի, իսկ հունիսի 9-ին՝ Չեռնոգորիայի հետ։ Երկու խաղերն էլ կցուցադրվեն «Fast Sport» հեռուստաալիքով։
Էդուարդ Սպերծյանի խոսքերը նրա չեմպիոնության եւ հնարավոր տրանսֆերի վերաբերյալ՝ ԱՅՍՏԵՂ։
Քննարկեք նորությունները!
Անցնել մեկնաբանություններին ↓
Comments
0