Էրիկ Իսրայելյանը մեկ ամսից նորամուտը կնշի պրոֆեսիոնալ ռինգում

21-ամյա հայ բռնցքամարտիկ Էրիկ Իսրայելյանը պատրաստվում է իր առաջին մենամարտին պրոֆեսիոնալ ռինգում։ Սպորտսմենի նորամուտը նախատեսված է ապրիլի 10-ին Մոնրեալում՝ Eye of the Tiger բռնցքամարտի երեկոյի շրջանակներում։ Նրա առաջին մրցակցի անունը դեռևս անհայտ է։

Իսրայելյանը երիտասարդների աշխարհի և Եվրոպայի չեմպիոն է, ինչպես նաև Եվրոպայի մինչև 22 տարեկանների առաջնության բրոնզե մեդալակիր։ Նախկինում նա հայտնվել էր սկանդալի կենտրոնում՝ հրաժարվելով հանդես գալ Հայաստանի հավաքականի կազմում և Հայաստանի բռնցքամարտի ֆեդերացիայից պահանջելով բնակարան։ Սակայն ավելի ուշ մարզիկը գիտակցեց իր սխալը, ներողություն խնդրեց և շարունակեց ելույթները ազգային թիմի կազմում։

Չնայած սիրողական բռնցքամարտում ունեցած հաջողություններին՝ Իսրայելյանը երբեք չհաստատվեց Հայաստանի ազգային հավաքականի հիմնական կազմում։ Արդյունքում նա որոշեց կենտրոնանալ պրոֆեսիոնալ կարիերայի վրա՝ պայմանագիր կնքելով կանադական Eye of the Tiger Management պրոմոութերական ընկերության հետ։ Նույն կազմակերպությունում հանդես է գալիս նաև մեկ այլ հայ բռնցքամարտիկ՝ Էրիկ Բազինյանը, որը զգալի հաջողությունների է հասել պրոֆեսիոնալ ռինգում։