Էրիկ Դավթյանը կարող է պայմանագիր կնքել Կիպրոսի «Կրասավայի» հետ

17-ամյա ֆուտբոլիստ Էրիկ Դավթյանը, որը հանդես է գալիս Ֆինլանդիայի FC Honka ակումբում և հանդիսանում է Հայաստանի երիտասարդական հավաքականի անդամ, այս ամառ մասնակցել է Կիպրոսի «Կրասավա» ակումբի հավաքներին։ «Կրասավան» առաջիկա 2025/26 մրցաշրջանում առաջին անգամ կմասնակցի երկրի Բարձրագույն լիգային։

Ակումբի նախագահ Եվգենի Սավինը բարձր է գնահատել հայ ֆուտբոլիստի տաղանդը և հաստատել, որ նրա հետ պայմանագիր կկնքեն՝ հասունության տարիքին հասնելուց հետո.

«Պատկերացնո՞ւմ եք, ընդամենը 17 տարեկան է, «Ապոլլոնի» դեմ դուրս եկավ խաղադաշտ, վաստակեց 11 մետրանոց և շատ լավ հանդիպում անցկացրեց։ «Պաֆոսը» ցանկանում էր նրան վերցնել U19 թիմում, բայց նա ուզում է մնալ «Կրասավայում»։ Երբ Էրիկը դառնա 18 տարեկան, մենք անմիջապես պայմանագիր կկնքենք նրա հետ։ Շատ տաղանդավոր տղա է, հուսով եմ՝ Հայաստանի հավաքականը կնկատի նրան»,— ասել է Սավինը։

Էրիկ Դավթյանի կարիերան

• Ծնվել է Ֆինլանդիայում, հայկական արմատներով։

• 16 տարեկանից խաղում է FC Honka-ի հիմնական թիմում (Ֆինլանդիայի 4-րդ լիգա)։

• 2024-ին դարձել է Ֆինլանդիայի U19 չեմպիոն։

• 2024/25 մրցաշրջանում «Հոնկայի» հետ մասնակցել է Երիտասարդական Չեմպիոնների լիգային, երկու խաղում Մալթայի «Վալետտայի» դեմ խփել է գոլ և կատարել գոլային փոխանցում։

• Այս մրցաշրջանում արդեն 15 խաղում խփել է 3 գոլ։

• 2023-ին հրավիրվել է Հայաստանի U16 հավաքական։

• Կարող է խաղալ ինչպես հարձակման երկու թևերում, այնպես էլ պաշտպանությունում։

«Կրասավա»-ն և նոր փուլը

Եվգենի Սավինի կողմից ստեղծված «Կրասավա» ակումբը պատմության մեջ առաջին անգամ կմասնակցի Կիպրոսի Բարձրագույն լիգային։ Հայ տաղանդի տեղափոխությունը կարող է դառնալ կարևոր քայլ ակումբի զարգացման համար և նոր հնարավորություն՝ Դավթյանի համար իր կարիերան բարձր մակարդակով շարունակելու։