Էնթոնի Սարդարյանը կարիերան կշարունակի Սարգիս Ադամյանի նախկին թիմում

17-ամյա հայ հարձակվող Էնթոնի Սարդարյանը պայմանագիր է ստորագրել գերմանական SSV Jahn Regensburg ակումբի հետ։ Հաջորդ մրցաշրջանում նա կխաղա մինչև 19 տարեկանների թիմում։

Մինչ Ռեգենսբուրգ տեղափոխվելը Սարդարյանը չորս տարի հանդես է եկել Նյուրնբերգի ակադեմիայում, որտեղ ավարտված մրցաշրջանում հանդես է եկել մինչև 17 տարեկանների կազմում՝ խփելով 5 գոլ և կատարելով 6 գոլային փոխանցում։

SSV Jahn Regensburg-ում ավելի վաղ հանդես է եկել նաև մեկ այլ հայ ֆուտբոլիստ՝ Հայաստանի ազգային հավաքականի հարձակվող Սարգիս Ադամյանը, ով խաղացել է ակումբում 2017–2019 թվականներին, ինչպես նաև 2024/25 մրցաշրջանի երկրորդ կեսում՝ վարձակալությամբ։

Իր սոցիալական ցանցերում Սարդարյանը գրել է․

«Հպարտությամբ տեղեկացնում եմ, որ երկարաժամկետ պայմանագիր եմ ստորագրել SSV Jahn Regensburg ակումբի հետ։ Առաջիկա մրցաշրջանում կմիանամ մինչև 19 տարեկանների թիմին։
Շնորհակալ եմ ակումբին վստահության համար և ամբողջությամբ նվիրված եմ ամեն օր ինձ ամբողջությամբ տալու։ Անհամբեր սպասում եմ այս նոր փուլին և իմ առաջընթացի շարունակությանը այս հրաշալի ակումբում»։