Էլինա Ավանեսյանը մամուլի ասուլիս անցկացրեց Երևանում

Սեպտեմբերի 8-ին Երևանում կայացավ մամուլի ասուլիս, նվիրված հայ թենիսիստուհի Էլինա Ավանեսյանի այցին Հայաստան։ Միջոցառումը կազմակերպվել էր «Կերոն» զարգացման հիմնադրամի և Հայաստանի թենիսի ֆեդերացիայի նախաձեռնությամբ։

Էլինա Ավանեսյանը համարվում է հայկական սպորտի ամենահեռանկարային ներկայացուցիչներից մեկը։ Մոտ մեկ տարի առաջ՝ «Կերոն» հիմնադրամի աջակցությամբ, նա ստացավ Հայաստանի Հանրապետության քաղաքացիություն, իսկ 2024 թվականի օգոստոսից հանդես է գալիս միջազգային մրցաշարերում Հայաստանի դրոշի ներքո։ Մարզուհին պատմական արդյունք է գրանցել՝ դառնալով առաջին հայ մարզիկը, որը տեղ է գտել Թենիսի կանանց ասոցիացիայի (WTA) համաշխարհային դասակարգման լավագույն 40-ում։ 2025 թվականի մարտին նա գրանցեց իր կարիերայի լավագույն ցուցանիշը՝ զբաղեցնելով 36-րդ հորիզոնականը։

Ասուլիսին մասնակցում էին նաև «Կերոն» զարգացման հիմնադրամի գործադիր տնօրեն Վանանե Արարքցյանը և Հայաստանի թենիսի ֆեդերացիայի գործադիր տնօրեն և գլխավոր քարտուղար Գևորգ Կարամանուկյանը։

Լրագրողների հետ զրույցում Ավանեսյանը նշեց, որ վնասվածքների պատճառով վերջին ամիսներին զիջել է իր դիրքերը, սակայն չի վհատվում և պատրաստ է վերադառնալ նախկին մակարդակին․
«Իմ բոլոր ջանքերը կուղղեմ նոր հաջողությունների հասնելուն և Հայաստանը պատվով ներկայացնելուն միջազգային հարթակներում։ Ամեն անգամ մեծ ուրախությամբ եմ վերադառնում Հայաստան և ոգևորությամբ մասնակցում տարբեր միջոցառումների», — ասաց նա։

Ավանեսյանի գլխավոր երազանքներից մեկը մնում է Օլիմպիական խաղերին մասնակցելը։ Մարզուհին ընդգծեց, որ մեծ ակնկալիքով է սպասում Լոս Անջելես-2028-ին։

Հայ թենիսիստուհին արդեն անցկացրել է վարպետության դաս Ծաղկաձորում, որին մասնակցել է ավելի քան 200 երեխա և պատանի թենիսիստ։ Նա բարձր է գնահատել երեխաների շրջանում թենիսի հանդեպ նկատվող հետաքրքրությունը։ Սեպտեմբերի 10-ին մարզուհին կայցելի նաև Դիլիջան՝ հանդիպելու տեղի մարզադպրոցի սաներին։

Ավանեսյանի Հայաստան այցի գլխավոր հովանավորն է Adidas ապրանքանիշի պաշտոնական ներկայացուցիչը։ Մարզուհին Հայաստանում կմնա մինչև սեպտեմբերի 10-ը։