Էլինա Ավանեսյանը պարտավոր է փոխհատուցում վճարել Ռուսաստանին քաղաքացիության փոփոխությունից հետո

Սպորտային արբիտրաժի ազգային կենտրոնը որոշում է կայացրել թենիսիստուհի Էլինա Ավանեսյանի գործով, որը 2024 թվականին սկսել է հանդես գալ Հայաստանի դրոշի ներքո։ Արբիտրաժը բավարարել է Ռուսաստանի թենիսի ֆեդերացիայի (ՌԹՖ) հայցը, որը վերաբերում էր ֆինանսական վնասների փոխհատուցմանը՝ սպորտային պատրաստության պայմանագրի պայմանները չկատարելու համար։

Ինչպես հաղորդել են ՌԹՖ-ից, դատավարությունը տևել է մի քանի ամիս։ Արդյունքում արբիտրաժը հիմնավոր է ճանաչել ռուսական կողմի պահանջները։ Ըստ ընդունված որոշման՝ Ավանեսյանը պարտավոր է ֆեդերացիային փոխհատուցել իր մարզական պատրաստության հետ կապված ծախսերը, ինչպես նաև պայմանագրով նախատեսված վճարումները, այդ թվում՝ պրոֆեսիոնալ թենիսային գործունեությունից ստացված եկամտի մի մասը և հարակից ծախսերը։

Հիշեցնենք, որ 2024 թվականի օգոստոսին 23-ամյա մարզուհին պաշտոնապես փոխել է իր սպորտային քաղաքացիությունը՝ ռուսական ֆեդերացիայից անցնելով հայկականի։ Այս քայլը դարձել է նրա կարիերայի կարևոր փուլերից մեկը և լայն արձագանք է ստացել թենիսային հանրության շրջանում։

Էլինա Ավանեսյանը ITF շարքի 14 մրցաշարերի հաղթող է՝ մենախաղում և զուգախաղում։ Ներկայումս նա զբաղեցնում է WTA վարկանիշի 118-րդ տեղը և շարունակում է ելույթները միջազգային ասպարեզում՝ ներկայացնելով Հայաստանը։