Եղիշե Մելիքյան․ «Պորտուգալիան ունի թույլ կողմեր, կփորձենք օգտվել դրանցից»

2026 թ․ աշխարհի առաջնության ընտրական փուլի խաղից առաջ Հայաստանի հավաքականի գլխավոր մարզիչ Եղիշե Մելիքյանը մամուլի ասուլիս անցկացրեց և պատասխանեց լրագրողների հարցերին։ Հայաստան – Պորտուգալիա հանդիպումը կայանալու է սեպտեմբերի 6-ին Երևանում։

Եղիշե Մելիքյանի մամուլի ասուլիսը Պորտուգալիայի դեմ խաղից առաջ

— Ի՞նչ եք սպասում վաղվա խաղից։ Ակնհայտ է, որ դա շատ հուզիչ հանդիպում կլինի՝ հաշվի առնելով, որ սա առաջին խաղն է Դիոգու Ժոտայի մահից հետո։ Ի՞նչ կասեք։

— Իհարկե, մեզ համար շատ բարդ խաղ է լինելու։ Մենք խաղալու ենք շատ ուժեղ թիմի դեմ։ Պորտուգալիայի հավաքականը Եվրոպայի լավագույններից մեկն է, և մենք դա լավ գիտակցում ենք։ Բայց մենք մեր պլանն ունենք։ Պորտուգալիան նույնպես ունի թույլ կողմեր․ քիչ են, բայց կան։ Կփորձենք օգտվել դրանցից և փակել մրցակցի ուժեղ կողմերը։ Դաշտում կլուծենք մեր խնդիրները։

— Մրցակցի համար անակնկալներ պատրաստե՞լ եք։ Մի քանի պլան ունե՞ք խաղի համար։

— Իհարկե, պլաններ ունեմ խաղի համար։ Կաշխատե՞ն դրանք, կերևա խաղի ընթացքում։ Արդյոք դա կլինի անակնկալ մրցակցի համար, չգիտեմ, բայց հույս ունեմ՝ այո։ Ինչպես արդեն նշել եմ, նրանք ունեն թույլ կողմեր, և մենք կփորձենք դրանցից օգտվել։ Ամեն պլան պետք է անսպասելի լինի մրցակցի համար։ Նախկինում Հայաստանի հավաքականին հետևել եմ միայն դրսից։ Մի քանի օր աշխատելուց հետո ավելի վստահ եմ տղաների նկատմամբ, տեսա նրանց լավագույն որակները և կարծում եմ, որ մեզ մոտ ամեն ինչ կստացվի։ Չեմ կարող ասել՝ կստացվի՞ վաղը, թե ոչ, մրցակիցը շատ ուժեղ է։ Բայց վստահ եմ՝ դրական փոփոխությունները մեր խաղում տեսանելի կլինեն։

— Ո՞վ կլինի թիմի ավագը Վարազդատ Հարոյանի հեռանալուց հետո։

— Դա բարդ հարց է, դեռ աշխատում ենք այդ ուղղությամբ։ Վաղվա խաղի համար ավագն արդեն ընտրված է, բայց դրա մասին կիմանաք խաղի ընթացքում։ Ավագի թևկապը չի նշանակում, որ հենց այդ ֆուտբոլիստն է գլխավոր առաջնորդը։ Մեր թիմում կան առաջնորդներ, ում համար կարևոր չէ՝ թևկապ ունեն, թե ոչ։

— Նախկին մարզիչները երբեմն խնդիրներ ունեին կարգապահության հարցում։ Դուք արդեն լուծե՞լ եք դրանք։

— Մեզ մոտ միայն մեկ խնդիր կա՝ վաղվա խաղը Պորտուգալիայի դեմ։ Թիմի ներսում խնդիրներ չկան։ Ինձ մոտ երբեք նման իրավիճակ չի եղել ակումբներում, վստահ եմ, որ չի լինի նաև հավաքականում։

— Ի՞նչ կասեք երկու նորեկների՝ Նարեկ Աղասարյանի և Կարեն Նալբանդյանի մասին։

— Ցանկանում եմ սերնդափոխություն տեսնել, կազմի երիտասարդացում և փոքր քայլերով առաջ շարժվել այդ ուղղությամբ։ Սուր որոշումներ չեն լինի։ Աստիճանաբար կլուծենք կադրային հարցերը, և ես գիտեմ՝ ինչպես դա անել։ Աղասարյանին ու Նալբանդյանին ես հրավիրել եմ ոչ թե կոնկրետ այս խաղերի համար, այլ որպեսզի նրանք ներգրավվեն հավաքականում, զգան մթնոլորտը։ Նրանք մեր ապագան են։ Կխաղա՞ն հիմա, դժվար է ասել, բայց ապագայում անպայման։

— Ստեփա Մկրտչյանը պատրաստ է խաղա՞լ։

— Ցավոք, ոչ։ Նա վնասվածք ունի և չի կարող խաղադաշտ դուրս գալ ոչ Պորտուգալիայի, ոչ էլ Իռլանդիայի դեմ։ Սա մեծ կորուստ է, բայց ունենք այն, ինչ ունենք։

— Դուք միշտ ուշադրություն եք դարձրել պաշտպանությանը և հիմնվել փորձառու ֆուտբոլիստների վրա։ Իսկ հավաքականում դա ամենաերիտասարդ գիծն է։ Ինչպե՞ս եք աշխատելու պաշտպանների հետ։

— Հավատացած եմ, որ ապագայում մենք շատ ուժեղ պաշտպանություն կունենանք։ Նրանք դեռ պետք է հասնեն իրենց գագաթնակետին։ Իհարկե, դա ռիսկ է՝ նման խաղերում միայն երիտասարդ պաշտպաններ օգտագործել։ Բայց ես չեմ վախենում աշխատել նրանց հետ։ Թեպետ եթե վաղը չհաղթենք, հաղթանակները անպայման կգան։ Առանց նման փորձի ապագայում լավ պաշտպանություն չենք ունենա։

— Ձեր դեբյուտը լինելու է նման ուժեղ թիմի դեմ։ Ի՞նչ եք զգում։

— Ինչպես արդեն ասել եմ, հավաքական գալուց հետո ես տեսա լուրջ ֆուտբոլիստների և չեմ վախենում նրանց հետ նման խաղերում հանդես գալ։ Ես վստահ եմ նրանց վրա։ Մեզ մոտ լավ կոլեկտիվ է և գերազանց կարգապահություն։ Չգիտեմ՝ ինչ է եղել մինչև ինձ, բայց հիմա ես տեսնում եմ միայն դրական։

— Ի՞նչ առաջադրանք է ձեզ տվել Հայաստանի ֆուտբոլի ֆեդերացիան։

— Այս ընտրական փուլում կոնկրետ առաջադրանքներ չունեմ։ Իմ հիմնական խնդիրը թիմի խնդիրները լուծելն է։ Որոնք են դրանք, չեմ կարող ասել։ Բայց դրանք կային, և ես պետք է վերացնեմ դրանք, ապա արդեն արդյունքի հասնեմ։ Ժամկետները դժվար է ասել՝ կստացվի՞ այս ընտրական փուլում, թե՞ հաջորդում։

— Դարպասապահի ընտրությունը միշտ կարևոր է։ Ի՞նչն է որոշիչ լինելու՝ փորձը, թե՞ մարզավիճակը։

— Չանչարևիչը փոքր վնասվածք ունի, և նրան առաջին խաղում դաշտ դուրս բերելը ռիսկային կլինի։ Վաղը ով կխաղա՝ դեռ չեմ ասի։

— Նախկինում տարաձայնություններ եք ունեցել ֆեդերացիայի նախագահի հետ։ Ինչպե՞ս լուծեցիք այդ հարցերը և ինչպես ստացաք հրավերը հավաքականը գլխավորելու։

— Լավ հարց է։ Ես արդեն հինգ տարի է աշխատում եմ Հայաստանի առաջնությունում և երբեք նման թեմաներից չեմ խուսափել։ Պատասխան ունեմ, բայց մինչ Պորտուգալիայի և Իռլանդիայի հետ խաղերը չեմ ուզում այդ մասին խոսել։ Դրանցից հետո անպայման ամեն ինչ կպատմեմ։ Միայն կասեմ, որ ամեն ինչ լավ է, և ինձ աջակցում են։

Հայաստան – Պորտուգալիա հանդիպումը կկայանա սեպտեմբերի 6-ին Երևանում՝ 2026 թ․ աշխարհի առաջնության ընտրական փուլի շրջանակում։ Հայաստանի ազգային հավաքականը, Եղիշե Մելիքյանի գլխավորությամբ, հույս ունի երկրպագուների աջակցության վրա և կփորձի պայքար մղել խմբի ֆավորիտներից մեկի դեմ։

Խաղի սկիզբը՝ տեղական ժամանակով ժամը 20:00-ին, Հանրապետական մարզադաշտում։

Էդուարդ Սպերցյան Պորտուգալիայի առաջիկա խաղից առաջ․ «Երբ գալիս եմ Հայաստանի հավաքական, դա մեծ պատիվ է»