Եղիշե Մելիքյանը մտադիր է վերադարձնել Հենրիխ Մխիթարյանին Հայաստանի հավաքական

Հայաստանի ազգային հավաքականի գլխավոր մարզիչ Եղիշե Մելիքյանը, ով իր ղեկավարությամբ առաջին հաղթանակը տոնեց Իռլանդիայի դեմ խաղում, հայտարարել է, որ կփորձի հավաքական վերադարձնել նախկին ավագ Հենրիխ Մխիթարյանին։

«Այսօր Մխիթարյանի հետ խոսեցի․ չեմ կարող ասել՝ ինչի մասին, բայց խոսեցի։ Պատրաստվում եմ Իտալիա մեկնել և Հենրիխի հետ անձամբ զրուցել։ Կփորձեմ վերադարձնել նրան։ Առայժմ չգիտեմ՝ նա ինչ կարծիք ունի այս հարցի շուրջ», — ասել է Մելիքյանը Պետրոս Ղազարյանին տված հարցազրույցում։

36-ամյա կիսապաշտպանը Հայաստանի հավաքականում կարիերան ավարտել է 2022-ին։ Նրա վերջին հանդիպումը ազգային թիմում կայացել է 2021-ի նոյեմբերին Գերմանիայի դեմ խաղում (1:4), որտեղ Մխիթարյանը խփեց մեր հավաքականի միակ գոլը։

Ֆուտբոլիստը բազմիցս ընդգծել է, որ հավաքական վերադառնալը քիչ հավանական է, խոստանալով բացահայտել իր որոշման պատճառները միայն ակումբային կարիերան ավարտելուց հետո։

Ներկայումս Հենրիխ Մխիթարյանը հանդես է գալիս Միլանի «Ինտերում», որի հետ պայմանագիր ունի մինչև 2026 թվականի ամառ։