Էդմեն Շահբազյան. Պլանավորում եմ գերիշխել Պետրոսկու դեմ

Վաղը՝ հունիսի 14-ին, Ատլանտայում կայանալիք UFC Fight Night: Usman vs Buckley մենամարտային երեկոյին տեղի կունենա միջին քաշային կարգի հետաքրքիր հակամարտություն։ Էդմեն «Ոսկե տղա» Շահբազյանը (14-5) կմրցի Անդրե Պետրոսկու (13-3) հետ։ Սա Շահբազյանի 14-րդ մենամարտն է UFC-ում և արդեն երկրորդը 2025 թվականին։ Սակայն նա դեռևս ընդամենը 27 տարեկան է։

Մենամարտը խոստանում է լինել ոճերի դասական բախում. Շահբազյանը բրուտալ հարվածող է, մինչդեռ Պետրոսկին հիմնականում հենվում է ըմբշամարտի վրա։ Երկուսն էլ բան ունեն ապացուցելու։

«Ես ինձ հիմա արդեն վետերան եմ զգում UFC-ում», – պատմել է Շահբազյանը UFC.com-ին։ – «Պարգև է՝ այս տարիքում այսքան փորձ ունենալը և հիմնականում UFC-ում մենամարտելը։ Ես շարունակում եմ զարգանալ և ինձ շատ փորձառու եմ զգում։ Սա միանշանակ է»։

«Նա ամբողջովին չի ճանաչում իմ ոճը։ Հնարավոր է՝ որոշ տարրեր թերագնահատում է։ Ես պլանավորում եմ գերիշխել»։

34-ամյա Պետրոսկին երեք անընդմեջ հաղթանակ է արձանագրել և նշում է, որ այժմ իր կարիերայի լավագույն մարզավիճակում է։ Իսկ Շահբազյանը վերջին վեց մենամարտերում ունի 3 հաղթանակ և 3 պարտություն։ Սա հիանալի հնարավորություն է նոր հաղթական շարքի մեկնարկի և UFC միջին քաշայինների լավագույն տասնհնգյակին մոտենալու համար։

Երեկ երկու մարզիկներն էլ անցել են քաշային ստուգումը և մասնակցել հայացքների մենամարտին։

Նախորդ մենամարտում Շահբազյանը նոկաուտի էր ենթարկել Դիլան Բուդկային՝ առաջին ռաունդում։