Ջորջիո Պետրոսյանը ավարտում է կարիերան․ լեգենդար քիքբոքսերը հրաժեշտի մենամարտը կանցկացնի նոյեմբերին

21-րդ դարի լավագույն քիքբոքսերներից մեկը՝ Ջորջիո Պետրոսյանը, պաշտոնապես հայտարարեց իր կարիերայի ավարտի մասին։ Այս հայտարարությունն արվել է մայիսի 24-ին Միլանում անցկացված PetrosyanMania մրցաշարում նրա հաղթանակից հետո։ Երեկոյի գլխավոր մենամարտում «Բժիշկը» վստահ հաղթանակ տարավ ֆրանսիացի Էյմերիկ Լապորտի նկատմամբ՝ վճռով և պաշտպանեց WAKO Pro աշխարհի չեմպիոնի տիտղոսը։

Պետրոսյանի կարիերան՝ 115 մենամարտ, 108 հաղթանակ և լեգենդի կարգավիճակ
Այս մենամարտը Պետրոսյանի համար 115-րդն էր պրոֆեսիոնալ կարիերայում։ Նրա վիճակագրությունը խոսում է ինքն իրենից․

• 108 հաղթանակ

• 3 պարտություն

• 2 ոչ ոք

• 2 մենամարտ՝ առանց արդյունքի (No Contest)

Պետրոսյանը սկսել է կարիերան 2003-ին՝ 10 տարի անց այն բանից հետո, երբ ընտանիքով տեղափոխվել էր Իտալիա Հայաստանից։ Այդ ժամանակից ի վեր նա դարձել է տեխնիկական քիքբոքսինգի խորհրդանիշը և հազարավոր մարզիկների օրինակ ամբողջ աշխարհում։

Չեմպիոն՝ ամենահեղինակավոր կազմակերպություններում
Տարբեր տարիներին Ջորջիո Պետրոսյանը նվաճել է չեմպիոնական գոտիներ քիքբոքսինգի հեղինակավոր կազմակերպություններում․

• K-1 World Max (2009, 2010)

• Glory (2012)

• Hero Legends (2015)

• ISKA (2017)

• Janus Fight Night (2007, երկու անգամ)

• ONE Championship (2019)

• WAKO Pro (2024)

Զգացմունքային հրաժեշտ․ վերջին մենամարտը՝ նոյեմբերին
PetrosyanMania-ի հաղթանակից հետո Ջորջիոն ուղերձ հղեց երկրպագուներին սոցիալական ցանցերում՝ շնորհակալություն հայտնելով թիմին և ներկայացնելով իր ապագա պլանները։

Նա ընդգծեց, որ 23 տարի շարունակ պայքարել է՝ չնայած վնասվածքներին ու փորձություններին։

«Շաբաթ երեկոյան ես պաշտպանեցի իմ WAKO Pro աշխարհի չեմպիոնի գոտին բոլոր իմ երկրպագուների առաջ Միլանում՝ PetrosyanMania-ում, որը, ինչպես միշտ, անթերի կազմակերպել էր եղբայրս՝ Արմեն Պետրոսյանը։

Ովքեր ինձ լավ են ճանաչում, գիտեն, որ ես գոհ չէի իմ մարզավիճակից, բայց մենամարտերը միշտ չէ, որ ընթանում են այնպես, ինչպես պլանավորում ենք. այլապես ամեն ինչ շատ հեշտ կլիներ։ Ցանկանում եմ շնորհակալություն հայտնել իմ ամբողջ թիմին և բոլոր նրանց, ովքեր ինձ աջակցել են պատրաստության ընթացքում։ Իմ շուրջն իսկական պրոֆեսիոնալներ են։ Կարող էի հարյուրավոր անուններ նշել, բայց վախենում եմ ինչ-որ մեկին մոռանալ։ Իսկ քանի որ բոլորը ինձ համար կարևոր են, չեմ ուզում այդ սխալը գործել։

Մենամարտում եմ 16 տարեկանից և երբեք չէի պատկերացնում, որ այս պահը կգա այդքան արագ։ Չգիտեմ՝ երջանկության, թե ցավի պահ է սա, բայց պետք է ասեմ՝ այս մենամարտը իմ կարիերայի նախավերջինն էր։

Միշտ դուրս եմ եկել ռինգ՝ առանց բողոքելու՝ չնայած մարմնի տարբեր հատվածների վնասվածքներին, չնայած այն բոլոր փորձություններին, որոնք ուղեկցել են ինձ այս 23 տարիների ընթացքում։

Տարիները նաև ինձ համար են անցնում․ դեկտեմբերին կդառնամ 40 տարեկան։ Այդ իսկ պատճառով որոշել եմ իմ կյանքի վերջին մենամարտը անցկացնել նոյեմբերի 22-ին՝ կրկին PetrosyanMania-ում՝ Allianz Cloud մարզադահլիճում Միլանում։

Այս մարզաձեւի շնորհիվ ես շրջեցի ամբողջ աշխարհով, մենամարտեցի ամենահեղինակավոր հարթակներում, հաղթեցի տիտղոսային մենամարտերում, նվաճեցի բոլոր հնարավոր գոտիները և հանդիպեցի մոլորակի ամենաուժեղ մարտիկներին՝ երբեք չնահանջելով։

Այս ամենը՝ ոչ թե Ինստագրամի չեմպիոնների կամ կեղծ, թղթյա գոտիներ ունեցողների համար։

Այժմ ինձ պետք է մի փոքր հանգիստ... Շուտով կհանդիպենք»։

Ջորջիո Պետրոսյանը ավարտում է կարիերան գագաթնակետին՝ հաղթանակով, գոտով և անբասիր համբավով՝ որպես մոլորակի լավագույն մարտիկներից մեկը։ Նրա ուղին պարզապես տիտղոսների ցուցակ չէ՝ դա տոկունության, տաղանդի և սպորտին նվիրումի պատմություն է։

Իտալական հանդիսատեսը արդեն պատրաստվում է արժանավայել հրաժեշտ տալ «Բժիշկին»՝ նոյեմբերին, հենց այդ մրցաշարում, որը դարձավ նրա ժառանգության խորհրդանիշը։