Ջանես Նազարյանը դուրս եկավ Մ17 աշխարհի առաջնության կիսաեզրափակիչ՝ հունահռոմեական ըմբշամարտում

Հայ ըմբիշ Ջանես Նազարյանը (65 կգ) դուրս է եկել հունահռոմեական ըմբշամարտի մինչև 17 տարեկանների աշխարհի առաջնության կիսաեզրափակիչ, որը մեկնարկել է այսօր Աթենքում (Հունաստան)։

Քառորդ եզրափակչում Նազարյանը վստահ հաղթեց Եվրոպայի բրոնզե մեդալակիր Կիլիան Էդդուին (Ֆրանսիա)՝ 6:0 հաշվով։ Մինչ այդ նա հաղթել էր ադրբեջանցի Հուսեյն Իսկանդարովին (9:1) և ամերիկացի Արսենի Կիկինյովին (4:1)։

Կիսաեզրափակչում հայ ըմբիշը կհանդիպի ուկրաինացի Եգոր Տարասենկոյին։ Մյուս զույգում եզրափակիչի ուղեգրի համար կպայքարեն հնդիկ Անուժը և վրացի Էրեկլե Տավբերիձեն։ Եթե Նազարյանը և Տավբերիձեն դուրս գան եզրափակիչ, կկրկնվի Մ17 Եվրոպայի առաջնության եզրափակիչը, որտեղ վրացին հաղթել էր 9:0 հաշվով։

Մրցաշարի առաջին օրը Հայաստանի հավաքականի կազմում հանդես եկան ևս չորս ըմբիշներ, սակայն նրանք չկարողացան դուրս գալ կիսաեզրափակիչ։ Այնուամենայնիվ Մարտին Մանջիկյանը (48 կգ) և Խաչիկ Խաչիկյանը (110 կգ) շարունակում են պայքարի հնարավորություն ունենալ բրոնզե մեդալների համար՝ սփոփիչ գոտեմարտերի միջոցով, եթե նրանց մրցակիցները հիմնական ցանցից դուրս գան եզրափակիչ։ 

Կիսաեզրափակիչ զույգերը (առաջին օր)

48 կգ.
Կումարուլի (Ղազախստան) – Յամամոտո (Ճապոնիա)
Հասանով (Ուզբեկստան) – Սոյլու (Թուրքիա)

55 կգ.
Աբդիրասուլով (Կիրգիզստան) – Գուպտա (Հնդկաստան)
Բարոտով (Տաջիկստան) – Ասկար (Ղազախստան)

65 կգ.
Անուժ (Հնդկաստան) – Տավբերիձե (Վրաստան)
Տարասենկո (Ուկրաինա) – Նազարյան (Հայաստան)

80 կգ.
Բերեկետ (Թուրքիա) – Մարտիաշվիլի (Վրաստան)
Խոլմիրզաև (Ուզբեկստան) – Օսկոնբաև (Կիրգիզստան)

110 կգ.
Դելրուզ (Իրան) – Սիմսիվե (Վրաստան)
Կապկան (Թուրքիա) – Հարդիպ (Հնդկաստան)

Կիսաեզրափակիչները կանցկացվեն այսօր՝ մոսկովյան ժամանակով 18:00-ին։