Երկու կորուստ Իռլանդիայի հավաքականում՝ Հայաստանի դեմ երկրորդ խաղից առաջ

Ինչպես հայտնում է The Irish Times-ը, կիսապաշտպան Սեմի Սմոդիկսը և հարձակվող Քալլում Օ’Դաուդան չեն կարողանա մասնակցել Իռլանդիայի հավաքականի առաջիկա խաղերին Պորտուգալիայի և Հայաստանի դեմ՝ աշխարհի առաջնության ընտրական փուլի շրջանակներում։ Երկուսն էլ բաց են թողնելու հանդիպումները վնասվածքների պատճառով, որոնք ստացել են վճռական խաղերից առաջ։

Իռլանդիայի գլխավոր մարզիչ Հեյմիր Հալլգրիմսոնը ստիպված է եղել փոփոխություններ կատարել հայտավորված կազմի մեջ՝ հրավիրելով «Դանդի Յունայթեդ»-ի պաշտպան Ուիլ Ֆերիին, որի համար սա կլինի առաջին անգամը՝ ազգային հավաքականում։

Այս կորուստները կարող են նպաստավոր լինել Հայաստանի հավաքականի համար, որը հոկտեմբերի 14-ին կմեկնի Դուբլին՝ Իռլանդիայի դեմ խաղի համար։ Բարձր արդյունավետությամբ հայտնի Սմոդիկսի և մի քանի այլ առանցքային խաղացողների բացակայությունը կարող է թուլացնել իռլանդացիների հարձակողական ներուժը և լրացուցիչ հնարավորություն տալ Հայաստանի հավաքականին՝ բարելավելու իր դիրքերը խմբում։

Բացի այդ, իռլանդացիները արդեն մի շարք վնասվածքներ ունեն․ կազմից դուրս են Ռոբի Բրեյդին, Մեթ Դոհերթին, Բոսուն Լավալը և Ջեյսոն Նայթը։ Այս պայմաններում Հայաստանի թիմը, որը ցուցաբերում է աճող ինքնավստահություն և խաղային կայունություն, ունի բոլոր հնարավորությունները՝ օգտվելու իրավիճակից և պայքարելու կարևոր միավորների համար։ Միևնույն ժամանակ, կազմ են վերադարձել Շեյմուս Քոուլմանը և Թրոյ Փերոթը, ովքեր բաց էին թողել Երևանում կայացած խաղը, որն ավարտվել էր Հայաստանի հաղթանակով։

Հայաստանի հավաքականում ևս կա կորուստ․ ինչպես ավելի վաղ տեղեկացրել էինք, Էդգար Սևիկյանը բաց կթողնի հանդիպումները Հունգարիայի և Իռլանդիայի դեմ։

Իռլանդիա – Հայաստան հանդիպումը կկայանա հոկտեմբերի 14-ին Դուբլինում և խոստանում է դառնալ այս ընտրական արշավի կարևորագույն խաղերից մեկը։