«Մեզ համար դա շոկ էր». Սպերցյանը՝ Գալիցկու հիվանդության մասին

Հայաստանի հավաքականի ավագը և «Կրասնոդարի» կիսապաշտպան Էդուարդ Սպերցյանը կիսվել է ակումբի նախագահ և սեփականատեր Սերգեյ Գալիցկու առողջական վիճակի մանրամասներով։ Նրա խոսքերը հնչել են «Կրասնոդար. Ճանապարհ դեպի չեմպիոնություն» վավերագրական ֆիլմում։

Սպերցյանի խոսքով՝ թիմը երկար ժամանակ չէր հասկանում, թե ինչու Գալիցկին բացակայում էր ուսումնամարզական հավաքներից։

«Նա երկար ժամանակ չէր գալիս ուսումնամարզական հավաքին։ Բնականաբար մենք սկսեցինք հարցեր տալ, պարզել՝ ինչ է տեղի ունեցել։ Ինչ-որ պահի մեզ ասացին ճշմարտությունը։ Դա իսկական շոկ էր մեզ համար։ Իհարկե, մենք մշտապես քննարկում էինք դա տղաների հետ և աղոթում։ Աստված տա՝ նրա մոտ ամեն ինչ լավ լինի։ Այն ամենը, ինչ նա արել է մեզ համար… ես կասեի՝ նա մեզ համար հոր պես է», — նշել է ավագը։

Տեղեկություններ Գալիցկու ախտորոշման մասին

Ավելի վաղ ռուսական մամուլում տեղեկություններ էին հայտնվել Գալիցկու մոտ հնարավոր օնկոլոգիական հիվանդության կրկնության մասին։ ԶԼՄ-ների տվյալներով՝ բժիշկների կանխատեսումը եղել է անբարենպաստ։ Ակումբը պաշտոնական բժշկական մանրամասներ չի հրապարակել։

Ինքը՝ «ցուլերի» նախագահը, հաստատել է, որ իր առողջությունը «լավագույն վիճակում չէ»։ Նա խոստովանել է, որ հիվանդությունը ժամանակ առ ժամանակ նույնիսկ չի թույլ տվել ուղիղ եթերով դիտել թիմի հանդիպումները։

«Ակումբն այլևս կախված չէ մեկ անձից»

Գալիցկին ընդգծել է, որ գիտակցաբար կառուցել է կառավարման համակարգը այնպես, որպեսզի «Կրասնոդարը» բացառապես իրենից կախված չլինի։

«Չի կարելի համեմատել, թե հիմա ինչպես եմ մասնակցում ակումբի կյանքին և ինչպես էի մասնակցում հինգ տարի առաջ՝ մինչև իմ հիվանդությունն ու կյանքի բարդ իրավիճակները։ Եվ ես դա արել եմ միտումնավոր՝ ակումբն այլևս կախված չէ մեկ անձից։

Մեր եկամուտներն ու ռեսուրսները, որոնք ներդրված են դպրոցում և ակումբում, թույլ կտան բավական երկար ժամանակ հանգիստ լինել։ Երկրպագուները առաջիկա 10–15 տարիներին՝ լինեմ ես, թե ոչ, կարող են հանգիստ լինել։ Ակումբը կշարունակի գոյություն ունենալ և ֆինանսապես կմնա իր ներկայիս մակարդակում։ Այն, ինչ խոստացել էի, ես կատարել եմ», — հայտարարել է «Կրասնոդարի» սեփականատերը։

Հիշեցնենք, որ անցած տարվա գարնանը հաղորդվում էր, որ գործարարը ակումբի ակադեմիայում ներդրել է 7,8 միլիարդ ռուբլի։ Այս ներդրումները դարձան «ցուլերի» կայուն զարգացման երկարաժամկետ ռազմավարության մաս։

Ակումբի նախագահի հիվանդության պատմությունը և թիմի արձագանքը դարձել են «Կրասնոդարի» չեմպիոնական հավակնությունների մասին ֆիլմի ամենահուզիչ գծերից մեկը՝ ընդգծելով Գալիցկու առանձնահատուկ դերը ակումբի և ֆուտբոլիստների կյանքում։