Դեյան Ստանկովիչը արգելափակել է Նաիր Տիկնիզյանի տրանսֆերը

«Ցրվենա Զվեզդա»-ի նոր գլխավոր մարզիչ Դեյան Ստանկովիչը հանդես է եկել հայկական պաշտպան Նաիր Տիկնիզյանի վաճառքի դեմ՝ չնայած Ռուսաստանից ստացված շահավետ առաջարկին։

Բելգրադյան ակումբի գլխավոր տնօրեն Զվեզդան Տերզիչը հայտնել է, որ ռուսական ակումբներից մեկը պատրաստ էր Տիկնիզյանի համար վճարել 5,5 միլիոն եվրո, սակայն թիմի գլխավոր մարզիչը պնդել է ֆուտբոլիստին պահել կազմում։

— Մենք Ռուսաստանից ունենք 5,5 միլիոն եվրոյի առաջարկ։ Ակումբի անունը չեմ նշի։ Ստանկովիչը բառացիորեն աղաչում էր ինձ՝ ասելով. «Տերզա, Աստծո սիրուն համար, մի դիպչիր Տիկնիզյանին՝ նրա էներգիային, աշխատասիրությանը…», — Տերզիչի խոսքերն է փոխանցում Mondo-ն՝ հղում անելով Mozzart TV-ին։

Դեյան Ստանկովիչը հաստատել է, որ խնդրել է ղեկավարությանը չփոփոխել թիմի ներկայիս կազմը։ Նրա խոսքով՝ «Ցրվենա Զվեզդան» ունի բավական ուժեղ և հավասարակշռված կազմ, որը կարող է լուծել բարձրագույն խնդիրներ թե՛ ներքին առաջնությունում, թե՛ եվրոպական մրցաշարերում։

— Ես ղեկավարությանը ասացի՝ չդիպչել խաղացողներին։ Երբեմն ֆուտբոլիստը կարող է նոր մոտիվացիա ստանալ և բացահայտվել նոր ձևով։ Ինչ վերաբերում է Տիկնիզյանին, տնօրենը տեղեկացրեց, որ կա կոնկրետ առաջարկ, որը հնարավոր է անմիջապես իրագործել։ Ես խնդրեցի նրան թողնել թիմում, — նշել է Ստանկովիչը։

Հիշեցնենք, որ Նաիր Տիկնիզյանը «Ցրվենա Զվեզդա» է տեղափոխվել 2025 թվականի հուլիսին՝ Մոսկվայի «Լոկոմոտիվ»-ից։ Ընթացիկ մրցաշրջանում 26-ամյա պաշտպանը մասնակցել է 25 հանդիպման բոլոր մրցաշարերում և կատարել է երկու գոլային փոխանցում։

Ավելի ուշ հայտնի դարձավ, որ «Կրասնոդարը» ցանկանում է ձեռք բերել Տիկնիզյանին այս ձմռանը։