Դեպորտիվո Արմենիո. Ադրբեջանցիները միլիարդներ են ծախսում քարոզչության վրա, իսկ մենք դա անում ենք անվճար

Երբ խոսում են «Դեպորտիվո Արմենիոյի» մասին, արդեն ոչ թե հաղթանակների կամ պարտությունների մասին է խոսքը։ «Մարդիկ այլևս չեն խոսում՝ Արմենիոն հաղթե՞ց, թե՞ պարտվեց։ Նրանք խոսում են մարզաշապիկի մասին՝ ի՞նչ ուղերձ է այն պարունակում, ի՞նչ է ցանկանում փոխանցել աշխարհին», – ասում է ակումբի մարքեթինգի պատասխանատու Մարսելո Փափազյանը՝ ArmenianWeekly-ին տված հարցազրույցում։

Արգենտինայի հայկական սփյուռքի ակումբը գտել է ինքնարտահայտման յուրօրինակ ճանապարհ։ Պահպանելով պաշտոնական չեզոքություն՝ համաձայն AFA-ի և FIFA-ի կանոնակարգերի, Դեպորտիվո Արմենիոն մարզաշապիկի վրա պատկերում է պատմական հայկական նահանգներ, այդ թվում՝ Հայաստանի Հանրապետության սահմաններից դուրս գտնվողները։ Սակայն Արցախը բացակայում է՝ գիտակցված որոշում՝ պայմանավորված միջազգային սահմանափակումներով։

«Մի քանի տարի առաջ պաղեստինյան «Պալեստինո» ակումբը մարզաշապիկ էր թողարկել՝ թիվ 1-ը պատկերված էր Պաղեստինի քարտեզով։ FIFA-ն պատժեց նրանց։ Մենք չենք հատում քաղաքական սահմանը, – բացատրում է Փափազյանը։ – Բայց Հայաստանի պաշտոնական տարածքի պատկերը խախտում չէ։ 2015-ին մենք թողարկեցինք Ցեղասպանության 100-ամյակին նվիրված մարզաշապիկ, և այն առանց խնդիրների հաստատվեց AFA-ի կողմից»։

Փափազյանը շեշտում է, որ մարզաշապիկը պարզապես հագուստ չէ, այլ գործիք, որով հնարավոր է պատմել աշխարհի հայերի պատմության, մշակույթի և մարտահրավերների մասին։ «Այսօր շատ պետություններ ներկայացնում են իրենց ֆուտբոլային ակումբների և ավիաընկերությունների միջոցով։ Ադրբեջանը՝ օրինակ, «Աթլետիկո Մադրիդի» միջոցով։ Իսկ մենք ունենք ակումբ։ Եվ այն միայն արգենտինահայ համայնքի ակումբը չէ․ այն համայն սփյուռքի ակումբն է։ Պետությունները միլիոններ են ծախսում քարոզչության վրա, իսկ մենք ունենք մերը՝ անվճար»։

Նա համեմատում է Արմենիոն ադրբեջանական ակումբների հետ. «Նայեք Իրավանին կամ Ղարաբաղին։ Մենք կարողացանք բարձրացնել հայկական հարցը, ներխուժման վտանգը՝ ընդամենը մարզաշապիկով։ Առանց փողի, առանց Առաջին դիվիզիոնի, առանց հզոր հովանավորների։ Պատկերացրեք՝ ինչի կարող էինք հասնել, եթե լինեինք Պրեմիեր լիգայում»։

Ակումբի նախագահ Լուչիանո Նաքիսը կարևորում է նաև այս մարզաշապիկների գործնական օգուտը. «Դրանք եկամուտ են բերում, որով պահում ենք ակումբի սիրողական ուղղությունները՝ երիտասարդական և կանանց ֆուտբոլը, որտեղ մասնակցությունը լիովին անվճար է»։

Նա նաև նշել է Deportivo Armenio հավելվածի գործարկման մասին, որը թույլ է տալիս ցանկացած ցանկացողի՝ հայ կամ ոչ հայ, միանալ ակումբին և աջակցել այն։ «Մինչև $10 ամսականով կարելի է դառնալ մեր առաքելության մի մասը՝ աշխարհի ցանկացած կետից»։

Ակումբի հիմնական բարերարներից է բիզնեսմեն Մաքսիմիլիանո Կալչիանը՝ Մայամիից, ով աջակցում է Արմենիոյին 2000 թվականից։ Նրա ներդրումների թվում է նոր մարզադահլիճի կառուցումը և սոցիալական ծրագրերի իրականացումը։

«Մենք պարզապես ֆուտբոլային ակումբ չենք կառուցում, – ասում է Կալչիանը։ – Մենք ստեղծում ենք անվտանգ տարածք, մշակութային հարթակ, հույսի փարոս՝ հատկապես երեխաների համար»։ Նրա ուղերձը հստակ է․ աշխարհի բոլոր հայերը կարող են Դեպորտիվո Արմենիոն դարձնել համաշխարհային խորհրդանիշ, միավորող ուժ և մեր ժառանգության կենդանի վկայություն։

Լրիվ հարցազրույցը՝ ArmenianWeekly-ում։