Դավիթ Դավիդյանը վերադարձել է Հայաստանի հավաքական

27-ամյա կիսապաշտպան Դավիթ Դավիդյանը հրավեր է ստացել Հայաստանի ազգային հավաքական՝ մասնակցելու 2026 թվականի աշխարհի առաջնության ընտրական խաղերին հոկտեմբերին։ Այս մասին հայտնում է ռուսական «Ռոտոր» ակումբի պաշտոնական էջը։

Եղիշե Մելիքյանի գլխավորած թիմը կանցկացնի երկու արտագնա հանդիպում․ հոկտեմբերի 11-ին Բուդապեշտում՝ Հունգարիայի դեմ, և հոկտեմբերի 14-ին Դուբլինում՝ Իռլանդիայի դեմ։ Դավիդյանը կարող է խաղադաշտ դուրս գալ այդ խաղերից որևէ մեկում։

Վերջին անգամ ֆուտբոլիստը հրավիրվել էր հավաքական 2024 թվականի հոկտեմբերին, երբ թիմը գլխավորում էր Ալեքսանդր Պետրակովը։ Դավիդյանի ակտիվում երեք հանդիպում կա ազգային թիմում։

Անցած ամռանը կիսապաշտպանը լքեց Երևանի «Փյունիկը» և տեղափոխվեց Վոլգոգրադի «Ռոտոր»։ Ռուսաստանի Առաջին լիգայի ընթացիկ մրցաշրջանում նա անցկացրել է 9 խաղ, դարձել է երկու գոլի և երկու գոլային փոխանցման հեղինակ։

Հայաստանի հավաքականի գլխավոր մարզիչ Եղիշե Մելիքյանը լավ է ծանոթ Դավիդյանի հնարավորություններին․ հենց նրա ղեկավարության ներքո ֆուտբոլիստը երեք տարի հանդես էր գալիս «Փյունիկում»։ Այն ժամանակ նա ավելի հաճախ օգտագործվում էր որպես եզրային պաշտպան։ Այժմ «Ռոտորում» Դավիդյանը խաղում է ավելի մոտ հարձակմանը, բայց ազգային թիմում Մելիքյանը, ամենայն հավանականությամբ, կրկին կօգտագործի նրան պաշտպանությունում՝ հինգ պաշտպաններով սխեմայում։