Դանիել Կորմիեն տպավորված է Արման Ծառուկյանի ակտիվությամբ

UFC-ի նախկին չեմպիոնը կիսամիջին և ծանր քաշային կարգերում Դանիել Կորմիեն բարձր է գնահատել թեթև քաշային դիվիզիոնի առաջատար մարտիկներից մեկի՝ Արման Ծառուկյանի ներկայիս մարզավիճակն ու ակտիվությունը։

Կորմիեի խոսքով՝ հատկապես գրափլինգում Ծառուկյանն այսօր շատ համոզիչ է հանդես գալիս և կարող է համարվել քաշային կարգի ամենաուժեղ մարտիկը։

«Եթե խոսենք գրափլինգի մասին, ապա Արման Ծառուկյանն այժմ աներևակայելի ակտիվ է։ Անկեղծ ասած, այս տղան հնարավոր է աշխարհի լավագույն թեթևքաշայինն է։ Իսլամը հեռացել է, և Արմանը իսկապես թվում է թոփ մակարդակի մարտիկ՝ մեծ, ուժեղ, ֆիզիկապես շատ հզոր», — հայտարարել է Կորմիեն Red Corner MMA YouTube-ալիքին տված հարցազրույցում։

Նախկին չեմպիոնը նաև նշել է, որ UFC-ն հիանալի հնարավորություն ունի կազմակերպելու աղմկահարույց մենամարտ Արման Ծառուկյանի և գործող չեմպիոն Իլիա Տոպուրիայի միջև։

«Չեմպիոն Իլիա Տոպուրիան ֆենոմենալ է։ Ես կարծում եմ, որ հենց Իլիան և Արմանն են աշխարհի երկու լավագույն թեթևքաշայինները հենց հիմա։ Եվ նրանք պարտադիր պետք է մենամարտեն», — ընդգծել է Կորմիեն։

Նա հավելել է, որ չնայած այնպիսի հայտնի մարտիկների, ինչպիսիք են Փեդդի Փիմբլեթը և Ջասթին Գեյջին, բարձր մակարդակին ու ժողովրդականությանը, հենց Ծառուկյան–Տոպուրիա դիմակայությունն ունի հատուկ պոտենցիալ։

«Այո՛, Փեդդի Փիմբլեթը ուժէղ է։ Այո՛, Ջասթին Գեյջին ուժէղ է։ Բայց Արմանն ու Իլիան ունեն ինչ–որ ավելին՝ և՛ հմտությունների, և՛ պատմության առումով, և դրանից կարելի է մեծ մենամարտ ստանալ», — ամփոփել է Կորմիեն։

Ավելի վաղ Ծառուկյանը բազմիցս հայտարարել է, որ պատրաստ է մենամարտել դիվիզիոնի ցանկացած թոփ մրցակցի դեմ, իսկ Դանիել Կորմիեի խոսքերը միայն ավելացրել են երկրպագուների հետաքրքրությունը հնարավոր տիտղոսային դիմակայության նկատմամբ։