«Ցրվենա Զվեզդան» բարձրացրել է Նաիր Տիկնիզյանի առաջարկը՝ «Լոկոմոտիվը» մտածում է

Սերբական գրանդ «Ցրվենա Զվեզդան» շարունակում է փորձերը ձեռք բերելու Հայաստանի ազգային հավաքականի և Մոսկվայի «Լոկոմոտիվի» պաշտպան Նաիր Տիկնիզյանին։ Ինչպես հաղորդում է Metaratings.ru-ն, Բելգրադի ակումբը Մոսկվա է ուղարկել ֆուտբոլիստի տրանսֆերի վերաբերյալ երկրորդ պաշտոնական առաջարկը՝ բարելավված ֆինանսական պայմաններով։

Աղբյուրի տեղեկություններով՝ սերբերը 26-ամյա խաղացողի համար առաջարկում են 1.7 միլիոն եվրո և ևս 300 հազար եվրո՝ որպես բոնուսներ՝ կապված Չեմպիոնների լիգայի խմբային փուլ մտնելու հետ։ Առաջին առաջարկը կազմել էր 1.3 միլիոն եվրո և 700 հազար՝ բոնուսներով։

«Լոկոմոտիվը» դեռ պաշտոնապես չի պատասխանել։ Metaratings.ru-ի տվյալներով՝ ակումբը որոշում կայացնելու համար վերցրել է ժամանակ։ Չի բացառվում, որ նոր առաջարկը ևս մերժվի։

Տիկնիզյանը «Լոկոմոտիվում» է հանդես գալիս 2021 թվականից։ 2023/24 մրցաշրջանում նա մասնակցել է 33 հանդիպման բոլոր մրցաշարերում, խփել է 2 գոլ և կատարել 4 գոլային փոխանցում։ Transfermarkt-ի տվյալներով՝ նրա շուկայական արժեքը մոտ 6 միլիոն եվրո է։