Ինչ ասաց Պերկովիչը «Նոա» — «ԱԶ» Կոնֆերենցիաների լիգայի խաղից առաջ

Փետրվարի 19-ին «Նոա»-ն կանցկացնի իր պատմության ամենակարևոր հանդիպումներից մեկը։ Կոնֆերենցիաների լիգայի 1/16 եզրափակչում հայկական ակումբը կընդունի նիդեռլանդական «ԱԶ Ալկմար»-ին։ Հանդիպումը կկայանա Երևանում՝ Հանրապետական մարզադաշտում, և կմեկնարկի տեղական ժամանակով 21:45-ին։

Խաղից առաջ «Նոա»-ի գլխավոր մարզիչ Սանդրո Պերկովիչը մամուլի ասուլիս է անցկացրել, որտեղ խոսել է թիմի պատրաստվածության մասին ձմեռային դադարից հետո, գնահատել մրցակցի ուժեղ կողմերը, մեկնաբանել տրանսֆերային արշավը և խոստացել երկրպագուներին հպարտանալու առիթ։ Չնայած «ԱԶ»-ը համարվում է ֆավորիտ, հայկական ակումբում վստահ են իրենց ուժերին և հույս ունեն երկրպագուների աջակցության վրա այս երկխաղյա դիմակայության առաջին խաղում։

Սանդրո Պերկովիչի մամուլի ասուլիսը «ԱԶ»-ի դեմ խաղից առաջ

— Հաջողվե՞լ է բացահայտել մրցակցի թույլ կողմերը։

— Սա շատ ուժեղ թիմ է, և մենք մեծ հարգանքով ենք վերաբերվում նրանց։ Սակայն այո, մենք նկատել ենք որոշ թույլ կողմեր, որոնցից կփորձենք օգտվել վաղը։ Մենք լավ նախապատրաստական փուլ ենք անցկացրել։ Երկու ամիս պաշտոնական խաղեր չենք ունեցել, բայց լիովին պատրաստ ենք՝ ֆիզիկապես, տակտիկապես և հոգեբանորեն։ Վաղը դա ցույց կտանք խաղադաշտում։

— Կարողացե՞լ եք ֆուտբոլիստներին փոխանցել, որ թեև «ԱԶ Ալկմար»-ը ուժեղ և հայտնի թիմ է, նրանք նույնպես խնդիրներ ունեն, և «Նոա»-ն իրական շանսեր ունի։ Կարծո՞ւմ եք՝ խաղացողները հավատում են հաջողությանը։

— Չգիտեմ՝ ինչ խնդիրների մասին եք խոսում։ Առաջին հերթին մենք հավատում ենք մեր ուժերին։ Այժմ լավ մարզավիճակում ենք և վաղը դա ցույց կտանք։

— Սա երկխաղյա դիմակայություն է։ Որքանո՞վ է կարևոր, որ առաջին խաղը խաղում ենք տանը։ Ինչպիսի՞ արդյունք կարելի է համարել դրական առաջին խաղում։

— Կարծում եմ՝ այնքան էլ կարևոր չէ, թե որտեղ է անցկացվում առաջին խաղը։ Առջևում 180 րոպե կա։ Դիմակայության ելքը կվճռվի մեկ շաբաթ անց Նիդեռլանդներում։ Առաջին խաղում ցանկացած դրական արդյունք մեզ համար լավ կլինի։

— Ի՞նչը կլինի հաղթանակի բանալին։

— Մեր թիմը և այն խաղը, որը ցույց կտանք վաղը։ Հուսով եմ՝ երկրպագուները, որոնք կգան մարզադաշտ և կստեղծեն անհրաժեշտ մթնոլորտ, կօգնեն մեզ։ Մենք լավ պատրաստ ենք և մտադիր ենք որակյալ ֆուտբոլ ցուցադրել։

— Մրցակիցը խաղային տոնուսի մեջ է՝ խաղում է առաջնությունում և գավաթում։ Իսկ ինչպիսի՞ վիճակում է «Նոա»-ն և արդյո՞ք պատրաստ է ինտենսիվ խաղի։

— Այո, ընկերական և պաշտոնական խաղերը տարբեր են։ Մեզ էլ հետաքրքիր է՝ ինչպես կդիմանանք այդ տեմպին։ Բայց խաղային առումով ես առաջընթաց եմ տեսնում և հույս ունեմ, որ վաղը դա նկատելի կլինի։

— Ձմեռային տրանսֆերային պատուհանում լուրջ համալրումներ չեղան, սակայն հաստատ ուժեղացում կլինի՝ երկրպագուները։ Ի՞նչ կասեք նրանց։

— Երկրպագուները մեծ դեր խաղացին, երբ հաղթեցինք «Լեգիա»-ին և դուրս եկանք փլեյ-օֆֆ։ Ցանկանում եմ, որ վաղը գան լավ էներգիայով և ամբողջ խաղի ընթացքում աջակցեն մեզ։ Խոստանում եմ, որ տուն կվերադառնան իրենց թիմով հպարտանալու զգացումով։

— Լիգայի փուլում «Նոա»-ն հաճախ գոլ էր բաց թողնում առաջին րոպեներին։ Աշխատե՞լ եք այդ ուղղությամբ։

— Աշխատել ենք խաղի բոլոր բաղադրիչների վրա, բայց ֆուտբոլում միշտ կան մանրուքներ և անակնկալներ։ Հուսով եմ՝ վաղը ընդհանրապես գոլ չենք ընդունի՝ ոչ սկզբում, ոչ էլ խաղի ընթացքում։

— «ԱԶ»-ը համարվում է ֆավորիտ։ Սա ճնշո՞ւմ է ձեզ։

— «ԱԶ»-ը իսկապես ուժեղ թիմ է, ունի աշխարհի լավագույն ակադեմիաներից մեկը։ Այո, նրանք ֆավորիտ են։ Բայց ֆուտբոլում ամենակարևորը քրտնաջան աշխատանքն է և ամբողջ 90 րոպեի ընթացքում կենտրոնացած խաղը։ Մնացածը նշանակություն չունի։

— Եթե հաղթեք, ի՞նչ կանեք։

— Կվազեմ ամբողջ Երևանով, ոչ թե միայն խաղադաշտով։

— Ձմռանը թիմից հեռացան երկու ձախ վինգերներ՝ Պինսոնն ու Գրիգիչը։ Փոխարենը միացավ Միսակ Հակոբյանը։ Ի՞նչ սպասելիքներ ունեք նրանից։

— Որոշ ֆուտբոլիստներ հեռացան թիմից, և ուզում եմ շնորհակալություն հայտնել նրանց կատարած աշխատանքի համար։ Ինչ վերաբերում է Միսակ Հակոբյանին՝ հնարավորություն ունեցանք պայմանագիր կնքել երիտասարդ հայ ֆուտբոլիստի հետ և օգտվեցինք դրանից։ Նա մեծ պոտենցիալ ունի, բայց դեռ պետք է աշխատի իր վրա։ Վաղը և պատասխան խաղում նա չի խաղա, քանի որ հայտավորված չէ Կոնֆերենցիաների լիգայում, սակայն Հայաստանի առաջնությունում նրան կտեսնեք։

— Գոհ ե՞ք ձմեռային տրանսֆերային արշավից։

— Մարզիչները միշտ ավելի շատ խաղացողներ են ուզում։ Բայց տրանսֆերները բարդ գործընթաց են։ Շուկայում միշտ ակտիվ ենք։ Իսկ դիրքերի մասին՝ եթե լավ խաղացող է, պետք է պայմանագիր կնքել։

— «ԱԶ»-ի ամենաուժեղ կողմը։

— Նրանք ունեն անհատապես շատ ուժեղ ֆուտբոլիստներ, ամբողջ 90 րոպեի ընթացքում խաղում են բարձր ինտենսիվությամբ։ Սա դինամիկ թիմ է։ Վինգերներն ու կիսապաշտպանները ստեղծում են թվային առավելություն։ Բացի այդ, մի շարք առաջատարներ վերադարձել են վնասվածքներից։ Ինձ շատ հետաքրքիր է՝ ինչպես կդասավորվի վաղվա խաղը։

— Փոփոխություններ եղան մարզչական շտաբում։ Ի՞նչ կտա դա թիմին։

— Փոխվել են դարպասապահների և ֆիզպատրաստության մարզիչները։ Սա սովորական ռոտացիա է, որը պետք է բարելավի մեր աշխատանքը՝ ինչպես ցանկացած տրանսֆեր։

— Վերջերս «Նոա»-ն ներկայացրեց նոր բազան։ Ի՞նչ կտա դա թիմին։

— Եվրոպայում քիչ ակումբներ ունեն նման ենթակառուցվածք։ Հայաստանում պետք է հպարտանան, որ ունենք նման բազա։ Նկարներ էի ուղարկել ծանոթ մարզիչներին և ֆուտբոլիստներին՝ նրանք հաճելիորեն զարմացած էին պայմաններից։ Վստահ եմ՝ սա կօգնի «Նոա»-ին բարձր մակարդակի հասնել, բայց դրա համար ժամանակ է պետք։

— Ի՞նչ վիճակում են Իմրան Ուլադը, Ֆայուլուն և Սանգարեն։

— Իմրան Ուլադը վերադարձել է երկու վնասվածքից հետո և այժմ լավ մարզավիճակում է, բայց դեռ պատրաստ չէ խաղալ ամբողջ 90 րոպեն։ Այնուամենայնիվ գոհ եմ նրա վիճակից։ Նա մեզ լրացուցիչ ուժ կտա։ Ֆայուլուն և Սանգարեն ավելի ուշ միացան թիմին Աֆրիկայի ազգերի գավաթից հետո, բայց գտնվում են գերազանց մարզավիճակում և լիովին պատրաստ են խաղալ։