Չորս հայ ըմբիշները կմասնակցեն 2025թ. աշխարհի առաջնությանը հունահռոմեական ոճի ըմբշամարտում

Այսօր՝ սեպտեմբերի 18-ին, Զագրեբում կմեկնարկի հունահռոմեական ոճի ըմբշամարտի աշխարհի առաջնությունը։ Առաջին օրը գորգ դուրս կգան չորս քաշային կարգերի մարզիկներ՝ 55, 77, 82 և 130 կգ։

Հայաստանի հավաքականը կներկայացնեն չորս ըմբիշներ․

• Մանվել Խաչատրյան (55 կգ)

• Մալխաս Ամոյան (77 կգ)

• Սամվել Գրիգորյան (82 կգ)

• Ռազմիկ Քուրդյան (130 կգ)

Վճռորոշ հանդիպումները հայ մարզիկների համար հեշտ չեն լինելու․ արդեն առաջին գոտեմարտերում նրանց մրցակիցները լուրջ փորձություններ են ներկայացնելու։

23-ամյա Ռազմիկ Քուրդյանը կդեբյուտավորի աշխարհի մեծահասակների առաջնությունում։ Սկզբնական գոտեմարտում նրան սպասվում է հանդիպում Ադրբեջանի փորձառու մարզիկ Բեկա Կանդելակիի հետ։

22-ամյա Մանվել Խաչատրյանը մրցաշարը կսկսի Թուրքիայի Մուհամմեդ Չաքըրի դեմ։ Թուրք ըմբիշը մեծահասակների մակարդակով քիչ փորձ ունի, բայց երիտասարդական մրցումներում մեդալներ է նվաճել։

Մալխաս Ամոյանը (77 կգ) համարվում է մրցաշարի ֆավորիտներից։ Առաջին շրջանի մրցակիցը կլինի Կամալ Բեյը (ԱՄՆ)։ Չնայած Ամոյանի բարձր կարգավիճակին՝ սկզբնական գոտեմարտերը միշտ էլ դժվար են ուժեղ մրցակիցների դեմ։ Հնարավոր են նաև «հայկական դերբիներ»․ հաջորդ փուլում Ամոյանը կարող է հանդիպել Բելառուսի ներկայացուցիչ Արման Կարապետյանի հետ, իսկ քառորդ եզրափակչում՝ Ֆրանսիայի ներկայացուցիչ Տիգրան Գալուստյանի հետ։

24-ամյա Սամվել Գրիգորյանը (82 կգ), ով արդեն հասցրել է հանդես գալ Եվրոպայի առաջնությունում, կդեբյուտավորի աշխարհի մեծահասակների առաջնությունում։ Առաջին շրջանում նրա մրցակիցը կլինի Ռուսաստանի Ադլետ Տյուլյուբաևը՝ 2024թ․ ԵԱ բրոնզե մեդալակիր, ով նախկինում հանդես էր գալիս մինչև 77 կգ քաշային կարգում։

Առաջին գոտեմարտերի զույգերը․

• 55 կգ (1/8 եզրափակիչ)․ Մանվել Խաչատրյան — Մուհամմեդ Չաքըր (Թուրքիա)

• 77 կգ (1/16 եզրափակիչ)․ Մալխաս Ամոյան — Կամալ Բեյ (ԱՄՆ)

• 82 կգ (1/16 եզրափակիչ)․ Սամվել Գրիգորյան — Ադլետ Տյուլյուբաև (Ռուսաստան)

• 130 կգ (1/16 եզրափակիչ)․ Ռազմիկ Քուրդյան — Բեկա Կանդելակի (Ադրբեջան)