Հոկեյի 2026 թվականի աշխարհի առաջնությունը IV դիվիզիոնում կարող է հետաձգվել

2026 թվականի հոկեյի աշխարհի առաջնությունը IV դիվիզիոնում, որը նախատեսված էր անցկացնել Քուվեյթում, հավանաբար կտեղափոխվի ավելի ուշ ժամկետի։ Այս մասին հայտնում է «Хоккейная Экзотика» տելեգրամյան ալիքը։

Աղբյուրի տեղեկություններով՝ Հոկեյի միջազգային ֆեդերացիայի (IIHF) խորհուրդը նախատեսում է անցկացնել արտահերթ նիստ, որի ընթացքում կքննարկվի մոտակա մրցաշարերի անցկացումը Մերձավոր Արևելքի երկրներում՝ մասնավորապես Արաբական Միացյալ Էմիրություններում և Քուվեյթում։

IV դիվիզիոնի մրցաշարը պետք է մեկնարկեր Քուվեյթում արդեն մեկ ամիս անց։ Մասնակիցների թվում է նաև Հայաստանի հավաքականը։ Սակայն Մերձավոր Արևելքում լարված իրավիճակի պատճառով մրցումների անցկացումը հայտնվել է վտանգի տակ։

«Хоккейная Экзотика»-ի աղբյուրների տվյալներով՝ ամենահավանական տարբերակը առաջնության տեղափոխումն է ավելի ուշ ժամկետների։ Մրցաշարը այլ երկիր տեղափոխելու տարբերակը գնահատվում է քիչ հավանական. տեսականորեն մրցաշարը կարող էր ընդունել Հայաստանը, սակայն մինչև մրցումների մեկնարկը կազմակերպման համար չափազանց քիչ ժամանակ է մնացել։

Հիշեցնենք, որ 2025 թվականի IV դիվիզիոնի աշխարհի առաջնությունը անցկացվել էր Երևանում։